കാണാതായ അലങ്കാരത്തത്തയെ അന്വേഷണത്തിനൊടുവില് തിരിച്ചുകിട്ടി. മക്കു എന്ന വിളിപ്പേരില് കുടുംബാംഗത്തെപ്പോലെ വളര്ത്തിയിരുന്ന ബ്ലൂ ഗോള്ഡ് മക്കാവോ ഇനത്തില്പ്പെട്ട അലങ്കാരത്തത്തയെ ആണ് രണ്ടു ദിവസത്തെ നിരന്തര അന്വേഷണത്തിനൊടുവില് തിരിച്ചുകിട്ടിയത്.
മക്കുവിനെ കാണാനില്ലെന്നും കണ്ടുകിട്ടുന്നവര് അറിയിക്കണമെന്നും അഭ്യര്ഥിക്കുന്ന പത്രപ്പരസ്യം വരെ നല്കി അന്വേഷണത്തിലായിരുന്നു വീട്ടുകാര്. പരസ്യം കണ്ടതോടെ പലയിടത്തും നിന്നും ഫോണ്കോളുകള് വന്നു. അവിടെയെല്ലാം ബാന്സി പറന്നെത്തി. എന്നാല് ആളുകൂടുന്നതും മറ്റും കണ്ട് ഭയന്നുപോയ മക്കു അടുത്തുവന്നില്ല. ഒടുവില് ഞായറാഴ്ച പതിനൊന്നരയോടെ കോവൂര് എംഎല്എ റോഡില് നിന്നാണ് തിരികെ കിട്ടിയത്.
മരത്തില് ഇരിക്കുന്ന മക്കുവിനെ ബാന്സി വിളിച്ചപ്പോള് ശ്രദ്ധിച്ചുവെങ്കിലും കാക്കകള് വന്നതോടെ അടുത്തില്ല. അവിടെ നിന്നു പറന്ന് ചെറിയൊരു തെങ്ങിന്റെ ഓലയില് ഇരുന്നു. ബാന്സിക്കൊപ്പമുണ്ടായിരുന്നവര് അടുത്തുള്ള കെട്ടിടത്തില് കയറി ഓല ഇളക്കിയപ്പോള് അനുസരണയുള്ള കുഞ്ഞായി മക്കു ബാന്സിയുടെ തോളിലേക്കു പറന്നെത്തി.
അഞ്ചുമാസം പ്രായമുള്ള മക്കുവിനെ മൂന്നരമാസം മുമ്പാണ് ഒന്നരലക്ഷം രൂപ കൊടുത്ത് ബാന്സി ജോസ് വാങ്ങിയത്. മൂത്തമകന് അമലിന്റെ താത്പര്യപ്രകാരമാണ് വാങ്ങിയതെങ്കിലും ഇളയമകന് അസല് ആണ് മക്കുവിന്റെ പ്രിയകൂട്ടുകാരനെന്ന് ബാന്സി പറയുന്നു. അമല് അമിനിറ്റീസ് എന്ന പേരില് ഹൗസ് കീപ്പിംഗ് കോണ്ട്രാക്ടിംഗ് സ്ഥാപനം നടത്തുന്ന ബാന്സി വൈകാതെ ഒരു പെറ്റ് ഷോപ്പ് ആരംഭിക്കാനുള്ള ഒരുക്കത്തിലാണ്.
ഓമനമൃഗങ്ങളോടും പക്ഷികളോടും പണ്ടുമുതലേ താത്പര്യമുണ്ടായിരുന്നു ബാന്സിക്ക്. മുന്തിയ ഇനത്തില്പ്പെട്ട വളര്ത്തുനായ്ക്കളും ഓമനപ്പൂച്ചകളും അലങ്കാരപക്ഷികളും മീനുകളുമെല്ലാം വീട്ടിലുണ്ട്. പൂന്തോട്ടനിര്മാണവും ബാന്സിയുടെ ഇഷ്ടവിനോദമാണ്.