കോട്ടയം: സ്വന്തം കുഞ്ഞിനെ ഇന്ത്യയെന്ന് പേരിട്ട് വിളിച്ച് ദമ്പതികള്. കടപ്പാട്ടൂര് സ്വദേശികളായ രഞ്ജിത്ത് – സന ദമ്പതികളാണ് കുഞ്ഞിന് രാജ്യത്തിന്റെ പേരുനല്കിയത്. ജൂലൈ പന്ത്രണ്ടാം തീയ്യതിയാണ് രഞ്ജിത്തിനും സനയ്ക്കും പെണ്കുഞ്ഞ് പിറന്നത്.
എല്ലാ ഭാരതീയര്ക്കും രാജ്യത്തിന്റെ പേര് അഭിമാനമാകുമ്പോള് മകള്ക്കത് ഇരട്ടി അഭിമാനമാകട്ടെയെന്നാണ് ഇവര് പറയുന്നത്. ആശുപത്രിയില് ജനന സര്ട്ടിഫിക്കറ്റിന്റെ ആവശ്യത്തിനായി ഫോറം പൂരിപ്പിച്ച് നല്കിയപ്പോഴാണ് കുഞ്ഞിന്റെ പേരിന്റെ സ്ഥാനത്ത് ‘ഇന്ത്യ’ എന്നെഴുതിയത്.
അത് ദേശീയത എഴുതാനുള്ള കോളമല്ലെന്നായിരുന്നു അപ്പോള് നഴ്സിന്റെ മറുപടിയെന്ന് രഞ്ജിത്ത് പറഞ്ഞു. സനയുടെയും രഞ്ജിത്തിന്റെയും പ്രണയവിവാഹമായിരുന്നു. 2021 ഒക്ടോബര് 31ന് കോട്ടയം ചോഴിയക്കാട്ട് അമ്പലത്തില്വച്ചാണ് രഞ്ജിത്ത് സനയെ വിവാഹം ചെയ്തത്.
Also Read: കൊറോണ വൈറസിന് പിന്നാലെ ചൈനയിൽ പുതിയ വൈറസ്; ‘ലങ്ക്യ ഹെനിപ’ പടരുന്നു, ആശങ്ക
വ്യത്യസ്ത സമുദായത്തില്പ്പെട്ടവരായതിനാല്തന്നെ രണ്ടുവീട്ടുകാരും ഇവരുടെ ബന്ധത്തെ എതിര്ത്തിരുന്നു. വിവാഹത്തെത്തുടര്ന്ന് രഞ്ജിത്തിന്റെ അമ്മ വീട്ടില്നിന്ന് ഇറങ്ങിപ്പോയി. ഇപ്പോള് കുഞ്ഞിന്റെ വരവോടുകൂടി എല്ലാ പ്രശ്നങ്ങളും തീരുമെന്ന പ്രതീക്ഷയിലാണ് രഞ്ജിത്ത്.
കുട്ടിക്കാലംമുതലേ രഞ്ജിത്തിന്റെ ആഗ്രഹം പട്ടാളക്കാരനാകണമെന്നായിരുന്നു. എന്നാല് വീട്ടിലെ അവസ്ഥ അനുകൂലമാവാത്തതിനെ തുടര്ന്ന് ഒന്പതാം ക്ലാസില് പഠനം നിര്ത്തി. സൈനീകനാവാനോ രാജ്യത്തിനായി എന്തെങ്കിലും ചെയ്യാനോ സാധിച്ചില്ലെന്ന വിഷമം എന്നും രഞ്ജിത്തിനുണ്ടായിരുന്നു. അതിനാല്തന്നെ പെണ്കുഞ്ഞാണ് ജനിക്കുന്നതെങ്കില് കുട്ടിക്ക് ‘ഇന്ത്യ’ എന്ന് പേരിടണമെന്ന ആഗ്രഹത്തിലായിരുന്നു രഞ്ജിത്ത്.
കുഞ്ഞിന് ‘ഇന്ത്യ’ എന്ന് പേരിട്ടപ്പോള് ചിലരൊക്കെ അവിശ്വാസത്തോടെ നോക്കിയെങ്കിലും ഇപ്പോള് എല്ലാവരും ഈ പേര് ഇഷ്ടപ്പെടുകയാണെന്ന് സന പറഞ്ഞു.