കൊച്ചി: വഴക്കിട്ടതിന് പിന്നാലെ അന്പത്തഞ്ചുകാരനായ കാമുകനെ മയക്കിക്കിടത്തിയശേഷം 48കാരിയായ കാമുകി വീട്ടുപകരണങ്ങളും പണവുമായി സ്വന്തം വീട്ടലേക്ക് മുങ്ങി. വീട്ടിലുണ്ടായിരുന്ന ഫ്രിഡ്ജ്, ടിവി, മിക്സി തുടങ്ങിയവയും പഴ്സിലുണ്ടായിരുന്ന പണവുമായാണ് കാമുകി മുങ്ങിയത്.
സംഭവത്തില് ബിനാനിപുരം പൊലീസ് ഇടപെട്ടതിനെത്തുടര്ന്ന് കാമുകന് വീട്ടുപകരണങ്ങള് തിരികെ ലഭിച്ചു. ഇടുക്കി സ്വദേശിയായ 55 കാരന്റെ വീട്ടിലെ സാധനങ്ങളാണ് കാണാതായത്. ഇയാള് വീട്ടുകാരുമായി വഴക്കിട്ട് മുപ്പത്തടത്ത് ഏറെനാളായി വാടകയ്ക്ക് താമസിക്കുകയാണ്.
കൂലിപ്പണി ചെയ്താണ് ജീവിക്കുന്നതെങ്കിലും സ്ഥിരംജോലിക്ക് പോകുന്നതിനാല് കൈവശം പണമുണ്ടാകാറുണ്ട്. ഇതിനിടയിലാണ് 48 കാരിയായ മധ്യവയസ്കയുമായി പരിചയത്തിലായത്. രണ്ട് കുട്ടികളുടെ മാതാവായ ഇവര് ഭര്ത്താവുമായി അകന്ന് കഴിയുകയാണ്.
കുറച്ചുകാലമായി ഇവരും മക്കളും ഇയാളുടെ വാടകവീട്ടിലാണ് താമസിക്കുന്നത്. കഴിഞ്ഞദിവസം രാത്രി ഭക്ഷണത്തിന് ശേഷം ഉറങ്ങാന് കിടന്ന കാമുകന് ഉണര്ന്നത് അടുത്തദിവസം 11 മണയോടെയാണ്. ആ സമയം വീട്ടില് മറ്റാരുമുണ്ടായിരുന്നില്ല.
മുറികളില് നോക്കിയപ്പോഴാണ് ഫ്രിഡ്ജ്, ടിവി, മിക്സി തുടങ്ങിയവയും പഴ്സിലുണ്ടായിരുന്ന പണവും നഷ്ടപ്പെട്ടതറിഞ്ഞത്. തുടര്ന്ന് ബിനാനിപുരം പൊലീസില് പരാതി നല്കിയതിനെ തുടര്ന്ന് നടത്തിയ അന്വേഷണത്തില് കാമുകിയെ സ്വന്തം വീട്ടില്നിന്ന് കണ്ടെത്തി. സ്റ്റേഷനില് വിളിച്ചുവരുത്തി സംസാരിച്ചതിനെത്തുടര്ന്ന് വീട്ടുപകരണങ്ങള് കൈമാറിയെങ്കിലും പണം നല്കിയിട്ടില്ല.