പ്രഖ്യാപനംകൊണ്ട് തന്നെ ഏറെ ശ്രദ്ധ നേടിയ ചിത്രമാണ് എസ്എസ് രാജമൗലിയുടെ ആര്ആര്ആര്. ബാഹുബലിക്കു ശേഷം എസ്എസ് രാജമൗലി ഒരുക്കുന്ന സിനിമ എന്നതുകൊണ്ട് തന്നെ ബാഹുബലിയേക്കാള് ഒരുപടി മുന്നിലാണ് സിനിമാ ലോകം പ്രതീക്ഷ നല്കുന്നത്.
അതേസമയം, ബാഹുബലി പോലെ പാന് ഇന്ത്യന് ചിത്രമായി ആര്ആര്ആര് സ്വീകരിക്കപ്പെടണമെന്നാണ് രാജമൗലിയും ആഗ്രഹിക്കുന്നത്. അലിയ ഭട്ടിനെയും അജയ് ദേവ്ഗണിനെയും ബോളിവുഡില് നിന്നും സമുദ്രക്കനിയെ തമിഴില് നിന്നും കൂടാതെ ഒലിവിയ മോറിസ്, റേ സ്റ്റീവന്സണ്, അലിസണ് ഡൂഡി തുടങ്ങിയ അന്തര്ദേശീയ താരങ്ങളെയുമൊക്കെ കഥാപാത്രങ്ങളാക്കുന്നതും ഈ ലക്ഷ്യത്തോടെയാണ്.
ഇപ്പോഴിതാ വോയിസ് ഓവറുകള്ക്കായി ഇന്ത്യയിലെ പ്രധാന ചലച്ചിത്രമേഖലകളില് നിന്നുള്ള മുന്നിര താരങ്ങളും ആര്ആര്ആറില് ഭാഗമാവുമെന്നാണ് പുതിയ റിപ്പോര്ട്ടുകള് സൂചിപ്പിക്കുന്നത്.
ബോളിവുഡില് നിന്ന് ആമിര് ഖാനും മലയാളത്തില് നിന്ന് മോഹന്ലാലും അടക്കമുള്ള താരങ്ങള് അതിഥിവേഷങ്ങളില് ചിത്രത്തില് എത്തിയേക്കുമെന്ന് മാസങ്ങള്ക്കു മുന്പ് ദേശീയമാധ്യമങ്ങള് റിപ്പോര്ട്ട് ചെയ്തിരുന്നു. എന്നാല് അതിഥി വേഷങ്ങളിലല്ല, മറിച്ച് രാം ചരണും ജൂനിയര് എന്ടിആറും അവതരിപ്പിക്കുന്ന പ്രധാന കഥാപാത്രങ്ങളെ സിനിമയില് അവതരിപ്പിക്കാനുള്ള ശബ്ദസാന്നിധ്യമായിരിക്കും സൂപ്പര് താരങ്ങളെന്നാണ് പുതിയ റിപ്പോര്ട്ടുകള് പറയുന്നത്.
ഹിന്ദിയില് നിന്ന് ആമിര് ഖാന്, തെലുങ്കില് ചിരഞ്ജീവി, തമിഴില് വിജയ് സേതുപതി, കന്നഡയില് ശിവരാജ് കുമാര്, മലയാളത്തില് മോഹന്ലാല് തുടങ്ങിയവരാണ് ചിത്രത്തില് ശബ്ദം നല്കുന്ന താരങ്ങള്. എന്നാല്, രാജമൗലിയോ നിര്മ്മാതാക്കളായ ഡിവിവി എന്റര്ടയ്ന്മെന്റ്സോ ഈ റിപ്പോര്ട്ടുകള് സ്ഥിരീകരിച്ചിട്ടില്ല.
രാം ചരണും ജൂനിയര് എന്ടിആറും പ്രധാന കഥാപാത്രങ്ങളായി എത്തുന്ന ‘ആര്ആര്ആര്’ന്റെ, ഇരുവരുടെയും ഫസ്റ്റ് ലുക്ക് വീഡിയോകള് അണിയറക്കാര് നേരത്തെ പുറത്തുവിട്ടിരുന്നു. കൊവിഡ് പ്രതിസന്ധിയെ തുടര്ന്ന് മാസങ്ങളോളം മുടങ്ങിക്കിടന്ന ചിത്രീകരണം കഴിഞ്ഞ മാസം ആദ്യമാണ് പുനരാരംഭിച്ചത്.