കാസര്കോട്: മക്കളെ വീട്ടില് ഉപേക്ഷിച്ച് യുവതി ലോറി ഡ്രൈവര്ക്കൊപ്പം ഒളിച്ചോടി വിവാഹിതയായി. ഏഴുവയസും ഒന്നരവയസും പ്രായമുള്ള മക്കളെ ഉപേക്ഷിച്ചാണ് യുവതി കാമുകനായ ലോറി ഡ്രൈവറോടൊപ്പം ഒളിച്ചോടിപ്പോയി വിവാഹിതയായത്.
ഇരുവര്ക്കുമെതിരെ ഭര്ത്താവിന്റെ പരാതിയില് ബേഡകം പോലീസ് ജുവനൈല് ജസ്റ്റിസ് നിയമപ്രകാരം കേസെടുത്തു. കര്ണാടകത്തിലേക്ക് മുങ്ങി വിവാഹിതരായ ഇരുവരും കര്ണാടക ബണ്ട്വാളില് ലോഡ്ജില് താമസിക്കവേ പോലീസ് കണ്ടെത്തി അറസ്റ്റു ചെയ്തു. കുറ്റിക്കോല് നെല്ലിത്താവ് സ്വദേശിനി രേഷ്മ (30), മുന്നാട് വട്ടപ്പാറ സ്വദേശി ഉണ്ണികൃഷ്ണന് (35) എന്നിവരാണ് അറസ്റ്റിലായത്.
ഇക്കഴിഞ്ഞ ബുധനാഴ്ച രാവിലെ എട്ടുമണിയോടെയാണ് ഇരുവരും ഒളിച്ചോടിപ്പോയി വിവാഹിതരായത്. കാഞ്ഞങ്ങാട് മാവുങ്കാലിലെ ഒരു ക്ഷേത്രത്തില് വെച്ചാണ് വിവാഹം നടന്നത്. പിന്നീട് കര്ണാടകത്തിലേക്ക് മുങ്ങുകയായിരുന്നു. സൈബര് സെല്ലിന്റെ സഹായത്താല് ഇവര് കര്ണാടകത്തിലെ ബണ്ട് വാളില് മുറിയെടുത്ത് താമസിക്കുന്നതായി പോലീസ് കണ്ടെത്തുകയായിരുന്നു.
വെള്ളിയാഴ്ച രാത്രിയിലാണ് ഇരുവരെയും പോലീസ് പിടികൂടിയത്. ഇരുവരുടെയും അറസ്റ്റ് രേഖപ്പെടുത്തി പോലീസ് നാട്ടിലെത്തിച്ചു. ബേഡകം പോലീസ് സര്ക്കിള് ഇന്സ്പെക്ടര് ടി ഉത്തംദാസിന്റെ നേതൃത്വത്തിലാണ് പോലീസ് കര്ണാടകത്തിലെത്തിയത്. ഇരുവരുടെയും മൊബൈല് ഫോണുകള് ഓഫായിരുന്നു. ജുവനൈല് ജസ്റ്റിസ് നിയമപ്രകാരം പ്രായപൂര്ത്തിയാകാത്ത മക്കളെ ഉപേക്ഷിച്ച് പോയതിനും അതിന് പ്രേരിപ്പിച്ചതിനുമാണ് പ്രതികളെ പോലീസ് അറസ്റ്റ് ചെയ്തത്.
പ്രായപൂര്ത്തിയാകാത്ത കുട്ടികളെ ഉപേക്ഷിച്ചു പോയതിന് യുവതിയുടെ പേരിലും അതിന് പ്രേരണ നല്കിയ കുറ്റത്തിന് കാമുകന്റെ പേരിലുമാണ് കേസെടുത്തത്. അറസ്റ്റ് ചെയ്ത ഇരുവരെയും കാസര്കോട്ടെത്തിച്ച് വൈദ്യ പരിശോധനയ്ക്ക് വിധേയരാക്കി. കാസര്കോട് ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയില് ഹാജരാക്കി. കോടതി ഇരുവരെയും റിമാന്ഡു ചെയ്തു.
ബേഡകം പോലീസ് സ്റ്റേഷനിലെ എസ്ഐ ഗംഗാധരന് പോലീസുകാരായ ശശിധരന് രാവണേശ്വരം, രമ്യ ബേത്തൂര്പാറ എന്നിവരുടെ നേതൃത്വത്തില് കര്ണാടകത്തില് എത്തിയ പോലീസ് സംഘമാണ് ഇവരെ പിടികൂടിയത്. ഭര്തൃമതിയെ പ്രലോഭിപ്പിച്ച് കൊണ്ടുപോയി വിവാഹം കഴിക്കാന് സഹായിച്ച പ്രതിയുടെ ബന്ധുവായ പാണത്തൂര് സ്വദേശിക്കെതിരെയും അന്വേഷണം നടക്കുന്നുണ്ട്. അതേസമയം, ക്ഷേത്രത്തില് നടക്കുന്ന രഹസ്യ വിവാഹത്തെ കുറിച്ചും പോലീസ് അന്വേഷണം നടത്തുന്നുണ്ട്.