തൃശൂര്: വീട്ടമ്മയെ കിണറ്റില് മരിച്ചനിലയില് കണ്ടെത്തി. തൃശ്ശൂര് ജില്ലയിലെ ആമ്പല്ലൂരിലാണ് സംഭവം. അളകപ്പനഗര് എരിപ്പോട് സ്വദേശി രാധയെയാണ് വീട്ടുപറമ്പിലെ കിണറ്റില് മരിച്ചനിലയില് കണ്ടെത്തിയത്. കൈകള് കെട്ടിയിട്ട നിലയിലും വായില് തുണി തിരുകിയ നിലയിലുമായിരുന്നു മൃതദേഹം.
അതേസമയം, മൃതദേഹത്തില് മറ്റുപരിക്കുകളോ മര്ദനമേറ്റതിന്റെ പാടുകളോ ഇല്ല. സംഭവം ആത്മഹത്യയാണെന്നാണ് പോലീസിന്റെ പ്രാഥമിക നിഗമനം. എന്നാല് പോസ്റ്റ്മോര്ട്ടം റിപ്പോര്ട്ട് ലഭിച്ചാലേ ഇക്കാര്യത്തില് വ്യക്തത വരുകയുള്ളൂവെന്നും പോലീസ് പറഞ്ഞു.
also read:യുവാവിനെ ലോഡ്ജ് മുറിയില് കെട്ടിയിട്ട് മര്ദിച്ച ശേഷം കവര്ച്ച, ദമ്പതികളടക്കം മൂന്നുപേര് പിടിയില്
ബുധനാഴ്ച രാവിലെയാണ് രാധയെ വീട്ടില് കാണാത്തതിനെ തുടര്ന്ന് നടത്തിയ തിരച്ചിലിലാണ് മൃതദേഹം കണ്ടെത്തിയത്. കഴിഞ്ഞദിവസം അര്ധരാത്രി 12 മണിയോടെ വീട്ടിലെത്തിയ മകന് വാതില് തുറന്നുനല്കിയത് രാധയായിരുന്നു. പുലര്ച്ചെ രണ്ടുമണിക്ക് രാധ മുറിയിലുണ്ടായിരുന്നതായി ഭര്ത്താവും മൊഴി നല്കിയിട്ടുണ്ട്. രാധയും ഭര്ത്താവും മക്കളും അടക്കം ആറുപേരാണ് ആമ്പല്ലൂരിലെ വീട്ടില് താമസിക്കുന്നത്.