കൊച്ചി; സംസ്ഥാന സര്ക്കാരിന്റെ ഓണക്കിറ്റ് വിതരണം ചൊവ്വാഴ്ച മുതല്. ഓണക്കിറ്റ് വിതരണത്തിന്റെ സംസ്ഥാന തല ഉദ്ഘാടനം ഓഗസ്റ്റ് 22 ന് മുഖ്യമന്ത്രി പിണറായി വിജയന് നിര്വഹിക്കും. ഇതിന് ശേഷമാണ് കിറ്റ് വിതരണം ആരംഭിക്കുക. 14 ഇനങ്ങളുമായാണ് ഭക്ഷ്യക്കിറ്റ് എത്തുക.
കിറ്റിന്റെ പാക്കിംഗ് എണ്പത് ശതമാനവും പൂര്ത്തിയായതായി സപ്ലൈക്കോ അറിയിച്ചു. മില്മ നെയ്യും ക്യാഷു കോര്പ്പറേഷനിലെ കശുവണ്ടി പരിപ്പും ഇക്കുറി കിറ്റില് ഇടം പിടിച്ചു. 14 ഉത്പന്നങ്ങള് അടങ്ങിയ കിറ്റിന് 434 രൂപ കുറഞ്ഞത് ചെലവ്. 90 ലക്ഷം ഭക്ഷ്യക്കിറ്റുകളാണ് സംസ്ഥാനത്തെ റേഷന് കാര്ഡ് ഉടമകള്ക്കായി തയ്യാറാകുന്നത്.
പാക്കറ്റ് ഉത്പന്നങ്ങളാണ് എല്ലാം. സപ്ലൈക്കോ സ്റ്റോറുകളോട് ചേര്ന്ന് കൂടുതല് സ്ഥലങ്ങള് വാടകയ്ക്ക് എടുത്തും പാക്കിംഗ് തുടരുകയാണ്. തിരുവനന്തപുരത്ത് തിങ്കളാഴ്ച വൈകീട്ടാകും മുഖ്യമന്ത്രി ഭക്ഷ്യക്കിറ്റ് വിതരണം ഉദ്ഘാടനം ചെയ്യുക.
തുടര്ന്ന് ചൊവ്വാഴ്ച രാവിലെ മുതല് റേഷന് കടകളില് ലഭ്യമായി തുടങ്ങും. അന്ത്യോദയ കാര്ഡ് ഉടമകള്ക്ക് ആദ്യം കിറ്റ് ഉറപ്പാക്കി മുന്ഗണന അനുസരിച്ച് ഓണത്തിന് മുന്പെ വിതരണം പൂര്ത്തിയാക്കാനാണ് ലക്ഷ്യം.