തൃശൂര്: ഭാര്യയെ കളിയാക്കിയത് ചോദ്യംചെയ്ത ഭര്ത്താവിനെ തടഞ്ഞു നിര്ത്തി മര്ദിച്ച് പ്രതികാരം ചെയ്ത് സര്ക്കാര് ജീവനക്കാരന്. രണ്ടു കുട്ടികളുടെ അമ്മയായ യുവതിയുടെ ഭര്ത്താവിനെയാണ് അയല്വാസിയും വടക്കാഞ്ചേരി തലപ്പിള്ളി താലൂക്ക് ഭൂഗര്ഭ ജല ഓഫീസിലെ ജീവനക്കാരനുമായ പട്ടിക്കര പുളിക്കല് വീട്ടില് ലിജേഷ് (35) മര്ദിച്ചത്.
സംഭവത്തില് കൈക്കും കാലിനും തലയ്ക്കും പരുക്കേറ്റ കേച്ചേരി പട്ടിക്കര ചൗട്ടിമാര് വീട്ടില് വിനോദിനെ (45) കുന്നംകുളം ഗവ. ആശുപത്രിയില് പ്രവേശിപ്പിച്ചു. ബുധനാഴ്ച്ച രാവിലെ 8.10 ന് ചെമ്മന്തട്ടയില് വച്ചാണ് സംഭവം.
കുന്നംകുളത്തെ ഭാവന റോഡിലെ ബുക്ക് ഷോപ്പിലെ ജീവനക്കാരനായ വിനോദ് ഇന്നലെ രാവിലെ കുന്നംകുളത്തേക്ക് വരുമ്പോഴാണ് ചെമ്മന്തട്ട പാടത്തുവച്ച് ബൈക്ക് തടഞ്ഞുനിര്ത്തി റോഡില് തള്ളിയിട്ട് മര്ദിച്ചത്. ബസ് അപകടത്തെ തുടര്ന്ന് രണ്ടു കാലിനും ശസ്ത്രക്രിയ കഴിഞ്ഞ വിനോദിന് കാലിനും പരുക്കേറ്റിട്ടുണ്ട്.
മുന്പും ഭാര്യയെ കളിയാക്കിയതിന് വിനോദ് ലിജേഷിനെ വീട്ടില് പോയി ശാസിച്ചിരുന്നു. കേച്ചേരിയിലെ സ്വകാര്യ റിയല് എസ്റ്റേറ്റ് സ്ഥാപനത്തിലെ ജീവനക്കാരിയായ ഭാര്യയെ കഴിഞ്ഞ ദിവസവും ലിജേഷ് ഫോണ് നമ്പര് ചോദിച്ച് വഴിയില്വച്ച് കളിയാക്കിയിരുന്നു. സംഭവം ഭര്ത്താവിനോട് പറഞ്ഞിരുന്നു. മുന്വൈരാഗ്യം വച്ചാണ് ലിജേഷ് വിനോദിനെ ബൈക്ക് തടഞ്ഞുനിര്ത്തി മര്ദിച്ചതെന്ന് വിനോദിന്റെ ഭാര്യ കുന്നംകുളം സിഐയ്ക്ക് നല്കിയ പരാതിയില് പറയുന്നു.