കോഴിക്കോട്: തലസ്ഥാനത്ത് ഇരുപത്തിയൊന്നുകാരി മേയര് ആണെങ്കില് ഇവിടെ ഒളവണ്ണ ഗ്രാമപഞ്ചായത്തിന്റെ പ്രസിഡന്റ് സ്ഥാനത്തേക്ക് ഇരുപത്തിരണ്ടുകാരിയെയാണ് തെരഞ്ഞെടുത്തിരിക്കുന്നത്. ഇടതുപക്ഷത്തിന്റെ സ്ഥാനാര്ത്ഥി തന്നെയാണ് പ്രസിഡന്റ് സ്ഥാനം നയിക്കാനൊരുങ്ങുന്നത്.
കോഴിക്കോട് ജില്ലയിലാണ് ഒളവണ്ണ ഗ്രാമപഞ്ചായത്ത്. ഒന്നാം വാര്ഡില് നിന്നു വിജയിച്ച എല്ഡിഎഫിലെ പി ശാരുതിയെ പ്രസിഡന്റാക്കാന് സിപിഎം നേതൃത്വം തീരുമാനിച്ചു. ഒന്നാം വാര്ഡില് 574 വോട്ടുകളുടെ ഭൂരിപക്ഷത്തിലാണ് ശാരുതി വിജയിച്ചത്. ഭവന്സ് ലോ കോളേജില് എല്എല്ബി അവസാനവര്ഷ വിദ്യാര്ഥിനിയായ ശാരുതി ഡിവൈഎഫ്ഐയുടെ സൗത്ത് ബോക്ക് കമ്മിറ്റി അംഗമാണ്. പറശേരി മനോഹരന്റെയും റജീനയുടെയും മകളാണ്.
ജനങ്ങള് തന്നില് അര്പ്പിച്ച വിശ്വാസം കാത്തുപരിപാലിക്കുന്നതിനും വിവേചനമില്ലാത്ത വികസനം സാധ്യമാക്കുന്നതിനും താന് ബാധ്യസ്ഥയാണെന്ന് നിയുക്ത പദവിയെക്കുറിച്ച് ശാരുതി പ്രതികരിച്ചു. ജനപ്രതിനിധി എന്ന നിലയില് ജനങ്ങളുടെ പ്രതീക്ഷയ്ക്കൊത്ത് ഉയരുവാന് കഴിയുമെന്ന വിശ്വാസമുണ്ട്. തുടര്പ്രവര്ത്തനങ്ങളിലും ഓരോരുത്തരുടെയും സ്നേഹവും പിന്തുണയും നിര്ദേശങ്ങളും ഉണ്ടാകുമെന്ന് പ്രതീക്ഷിക്കുന്നതായും ശാരുതി ഫേസ്ബുക്കില് കുറിച്ചു.
പ്രദേശത്തെ റേഷന് കടയുടമയ്ക്ക് കൊവിഡ് ബാധിച്ചപ്പോള് റേഷന് വിതരണം മുടങ്ങാതിരിക്കാന് കടയുടെ നടത്തിപ്പ് ഏറ്റെടുത്തതിലൂടെ ശാരുതി ശ്രദ്ധേയയായിരുന്നു. ആര്ആര്ടി വളണ്ടിയര്, കമ്യൂണിറ്റി കിച്ചണ് വളണ്ടിയര് എന്നീ നിലകളില് കൊവിഡ് പ്രതിരോധ പ്രവര്ത്തനങ്ങളില് സജീവമായി പങ്കെടുത്തുവരുന്നതിനിടെയാണ് മത്സരത്തിനിറങ്ങാന് മുന്നണി നിര്ദേശിക്കുന്നത്.
ബുള്ളറ്റ് ഓടിക്കുന്ന സ്ഥാനാര്ഥിയെന്ന നിലയില് ശാരുതിയുടെ തെരഞ്ഞെടുപ്പ് പ്രചാരണം ശ്രദ്ധിക്കപ്പെട്ടിരുന്നു. ബൈക്കോടിക്കുന്ന ചിത്രത്തോടു കൂടിയ തെരഞ്ഞെടുപ്പ് പോസ്റ്റര് സോഷ്യല് മീഡിയയിലും വൈറലായി. ദേശീയ മാധ്യമങ്ങളില് ഉള്പ്പെടെ ഇതുസംബന്ധിച്ച വാര്ത്തകള് വന്നു.
സംസ്ഥാനത്തെ തന്നെ വലിയ ഗ്രാമപഞ്ചായത്താണ് ഒളവണ്ണ. 23 വാര്ഡുകളുള്ള ഇവിടെ എല്ഡിഎഫ് 17 സീറ്റുകളിലാണ് വിജയം കണ്ടത്. രണ്ടുസീറ്റുകളില് സ്വതന്ത്രര് വിജയിച്ചു. യുഡിഎഫിനു മൂന്നു സീറ്റും എന്ഡിഎയ്ക്ക് ഒരു സീറ്റും ലഭിച്ചു.