തിരുവനന്തപുരം: സംസ്ഥാനത്ത് വരുംദിവസങ്ങളിലും മഴ തുടരും. ബംഗാള് ഉള്ക്കടലില് പുതിയ ന്യൂനമര്ദം രൂപപ്പെടാന് സാധ്യതയെന്ന് കാലാവസ്ഥാ വകുപ്പ് മുന്നറിയിപ്പ് നല്കി. മധ്യ പടിഞ്ഞാറന് ബംഗാള് ഉള്ക്കടലില് ഞായറാഴ്ചയോടെ ന്യൂനമര്ദം രൂപപ്പെടാന് സാധ്യതയുണ്ടെന്നാണ് അറിയിപ്പില് പറയുന്നത്.
വടക്കന് കേരള തീരം മുതല് തെക്കന് ഗുജറാത്ത് തീരം വരെ നിലനില്ക്കുന്ന ന്യുനമര്ദ്ദ പാത്തിയുടെയും ഷീയര് സോനിന്റെയും അറബിക്കടലില് പടിഞ്ഞാറന് കാറ്റ് ശക്തമാകുന്നതിന്റെയും സ്വാധീന ഫലമായി കേരളത്തില് ഓഗസ്റ്റ് 4 മുതല് 8 വരെ ശക്തമായ മഴയ്ക്കു സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
എട്ടു ജില്ലകളില് ഇന്ന് റെഡ് അലര്ട്ട് പ്രഖ്യാപിച്ചു. ഒരു ദിവസത്തെ ഇടവേളയ്ക്കു ശേഷമാണ് സംസ്ഥാനത്ത് വീണ്ടും കേന്ദ്ര കാലാവസ്ഥാ വകുപ്പിന്റെ അതി തീവ്ര മഴ മുന്നറിയിപ്പ്. 12 ജില്ലകളില് ഓറഞ്ച് അലര്ട്ട് എന്നായിരുന്നു രാവിലത്തെ മുന്നറിയിപ്പ്.
പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശൂര്, പാലക്കാട്, കണ്ണൂര് ജില്ലകളിലാണ് റെഡ് അലര്ട്ട്. കൊല്ലം, മലപ്പുറം, കോഴിക്കോട്, വയനാട്. കാസര്ക്കോട് ജില്ലകളില് ഓറഞ്ച് അലര്ട്ടും പ്രഖ്യാപിച്ചിട്ടുണ്ട്. തിരുവനന്തപുരത്ത് യെല്ലോ അലര്ട്ടാണ്.