കൊടുങ്ങല്ലൂര്: സ്കൂട്ടറില് സഞ്ചരിക്കവേ യുവാവ് വെട്ടിപ്പരിക്കേല്പ്പിച്ച യുവതി മരിച്ചു. തൃശ്ശൂരിലാണ് നടുക്കുന്ന സംഭവം. എറിയാട് ബ്ലോക്ക് ഓഫിസിന് തെക്ക് മാങ്ങാറ പറമ്പില് നാസറിന്റെ ഭാര്യ റിന്സി ആണ് മരിച്ചത്. മുപ്പത് വയസ്സായിരുന്നു. വെള്ളിയാഴ്ച രാവിലെ എട്ടോടെയാണ് മരണം.
വ്യാഴാഴ്ച രാത്രിയാണ് റിന്സിക്ക് വെട്ടേറ്റത്. കൈക്കും തലക്കും മറ്റും പരിക്കേറ്റ റിന്സിയെ ആദ്യം കൊടുങ്ങല്ലൂര് ചന്തപ്പുര എ.ആര്. മെഡിക്കല് സെന്ററില് പ്രവേശിപ്പിച്ചെങ്കിലും പിന്നീട് തൃശൂര് എലൈറ്റ് ആശുപത്രിയിലേക്ക് മാറ്റിയിരുന്നു. യുവതിയുടെ അറ്റുപോയ വിരലുകള് കവറിലാക്കിയാണ് ആശുപത്രിയില് എത്തിച്ചത്.
രാത്രി എട്ടിനാണ് സംഭവം. എറിയാട് കേരള വര്മ സ്കൂളിന് സമീപം ഭര്ത്താവിനൊപ്പം വസ്ത്രാലയം നടത്തുന്ന റിന്സി കടയില്നിന്ന് മക്കളോടൊപ്പം വീട്ടിലേക്ക് മടങ്ങുമ്പോഴായിരുന്നു ആക്രമണം. ആളൊഴിഞ്ഞ സ്ഥലത്ത് മറഞ്ഞുനിന്ന അക്രമി പെടുന്നനെ അക്രമം നടത്തുകയായിരുന്നു.
പ്രതി വലിയകത്ത് റിയാസ് (26) മുന്പ് യുവതിയുടെ തുണിക്കടയില് ജോലിക്കാരനായിരുന്നു. സംഭവസമയം അതുവഴി വന്ന ബൈക്ക് യാത്രികര് ബഹളം വെച്ചതോടെ ആക്രമി സ്ഥലം വിട്ടു. റിയാസ് റിന്സിയുടെ ഇവരുടെ സമീപവാസിയാണ്. ഇയാള്ക്കെതിരെ യുവതി നേരത്തേ പരാതി നല്കിയിരുന്നു. ഇതിലുള്ള പ്രതികാരമാണ് അക്രമത്തിന് പിന്നിലെന്ന് പറയുന്നു. പ്രതിക്കായി തിരച്ചില് തുടങ്ങി.