ന്യൂഡല്ഹി: കൊറോണ വൈറസിന്റെ പുതിയ വകഭേദമായ ഒമൈക്രോണ് ഇന്ത്യയിലും സ്ഥിരീകരിച്ചു. കര്ണാടകയിലാണ് വൈറസ് വകഭേദം കണ്ടെത്തിയത്. ചികിത്സയില് കഴിയുന്ന രണ്ടുപേരില് ഒമൈക്രോണ് വകഭേദം സ്ഥിരീകരിച്ചതായി കേന്ദ്ര ആരോഗ്യമന്ത്രാലയം അറിയിച്ചു.
കഴിഞ്ഞ ദിവസം ദക്ഷിണാഫ്രിക്കയില് നിന്ന് വന്നവര്ക്കാണ് ഒമൈക്രോണ് സ്ഥിരീകരിച്ചത്. 66 ഉം 46 ഉം വയസ്സുള്ള രണ്ടുപുരുഷന്മാര്ക്കാണ് രോഗം ബാധിച്ചത്. ജനിതക ശ്രേണീകരണ പരിശോധനയിലൂടെയാണ് ഇവരെ ബാധിച്ചത് ഒമൈക്രോണ് ആണ് എന്ന് സ്ഥിരീകരിച്ചത്.
കേരളത്തില് ഇന്ന് 4700 പേര്ക്ക് കോവിഡ്; 66 മരണം
അതേസമയം, ഭയപ്പെടേണ്ട സാഹചര്യമില്ലെന്നും ജാഗ്രത തുടരണമെന്നും ആരോഗ്യസെക്രട്ടറി ലാവ് അഗര്വാള് മാധ്യമങ്ങളോട് പറഞ്ഞു. കോവിഡ് പ്രോട്ടോക്കോള് പാലിക്കാന് എല്ലാവരും തയ്യാറാകണമെന്നും അദ്ദേഹം അറിയിച്ചു.
ഒമൈക്രോണ് ബാധിച്ചവര്ക്ക് നേരിയ രോഗലക്ഷണങ്ങള് മാത്രമാണെന്നും ഇതുവരെ ആരും തന്നെ ഗുരുതര രോഗലക്ഷണങ്ങള് കാണിച്ചിട്ടില്ലെന്ന് ലാവ് അഗര്വാള് അറിയിച്ചു. പത്തുപേരുടെ കൂടി പരിശോധനാഫലം വരാനുണ്ട്. സമ്പര്ക്കത്തിലുള്ളവരെ നിരീക്ഷണത്തിലാക്കിയിട്ടുണ്ട്.