തിരുവനന്തപുരം: പുറമ്പോക്ക് ഭൂമിയിലെ കുടില് പൊളിച്ചുമാറ്റി അമ്മയേയും പ്രായപൂര്ത്തിയാകാത്ത പെണ്മക്കളേയും ഇറക്കിവിട്ട സംഭവത്തില് കുടിയിറക്കപ്പെട്ടവര്ക്ക് വീട് വച്ച് നല്കുമെന്ന് സാമൂഹിക പ്രവര്ത്തകനും പ്രവാസി വ്യവസായിയുമായ ആമ്പലൂര് എംഐ ഷാനവാസ് അറിയിച്ചു. വീടിന്റെ നിര്മ്മാണം പൂര്ത്തിയാകുന്നതുവരെ ഇവര് താമസിക്കുന്ന വീടിന്റെ വാടക നല്കുമെന്നും ഷാനവാസ് പറഞ്ഞു. സമൂഹമാധ്യമങ്ങളില് വന്ന വാര്ത്തയുടെ അടിസ്ഥാനത്തിലാണ് അദ്ദേഹത്തിന്റെ തീരുമാനം.
കഴക്കൂട്ടം സൈനിക് നഗറിലാണ് അമ്മയും പ്രായപൂര്ത്തിയാകാത്ത മൂന്ന് പെണ്മക്കളുമടങ്ങിയ കുടുംബത്തെ മാരകായുധങ്ങളുമായെത്തിയ അയല്വാസികള് ഇറക്കിവിട്ട് കുടില് പൊളിച്ചുമാറ്റിയത്. സുറുമിയും മക്കളുമാണ് തെരുവിലായത്. അയല്വാസികളായ സഹോദരങ്ങളാണ് വീട് പൊളിച്ചതെന്ന് സുറുമി പോലീസില് നല്കിയ പരാതിയില് പറയുന്നു.
വീട്ടമ്മയായ സുറുമിയും അവരുടെ പ്രായപൂര്ത്തിയാകാത്ത മൂന്ന് മക്കളും പുറമ്പോക്കില് ഷെഡ് കെട്ടിയാണ് താമസിച്ചിരുന്നത്. ഈ മാസം പതിനേഴാം തീയതി ആയുധങ്ങളുമായെത്തിയ അയല്ക്കാര് ഇവരെ വീട്ടില് നിന്നും പുറത്താക്കി വീട് പൊളിച്ചുകളയുകയായിരുന്നു. ഏഴു വര്ഷത്തോളമായി ഈ പുറമ്പോക്ക് ഭൂമിയില് താമസിച്ചുവരികയാണ് കുടുംബം. ഇടക്ക് വീടിന്റെ ശോചനീയാവസ്ഥ കാരണം തൊട്ടടുത്തുള്ള മറ്റൊരു വാടക വീട്ടിലേയ്ക്ക് പോവുകയും ചെയ്തു.
എന്നാല് വാടക കൊടുക്കാന് കഴിയാതെ വന്നപ്പോള് ഒരു മാസം മുമ്പ് വീണ്ടും തിരികെ എത്തി ഉണ്ടായിരുന്ന ഷെഡ് ബലപ്പെടുത്തിയാണ് താമസം ആരംഭിച്ചത്. ഇതിനിടയിലാണ് അയല്വാസികളായ ഷംനാദും ദില്ഷാദും മാരകായുധങ്ങളുമായി ഇവിടെയെത്തി കുട്ടികളെ ഉപദ്രവിക്കുകയും വീട് പൂര്ണമായും പൊളിച്ചുമാറ്റുകയും ചെയ്തത്.
സംഭവത്തെ കുറിച്ച് മനുഷ്യാവകാശ കമ്മീഷനിലും ബാലാവകാശ കമ്മീഷനിലും പരാതി നല്കിയെന്ന് സുറുമി പറഞ്ഞു. വീട്ടമ്മയുടെ ഭാഗത്ത് നിന്നും പ്രകോപനമൊന്നുമില്ലാതെയാണ് അയല്ക്കാര് ഇവരെ പുറത്തിറക്കി വീട് പൊളിച്ചുനീക്കിയതെന്ന് സിസിടിവി ദൃശ്യങ്ങളില് നിന്ന് വ്യക്തമായിട്ടുണ്ട്. നിയമപ്രകാരം 59/5 ല് പെട്ട സ്ഥലം പുറമ്പോക്ക് ഭൂമിയാണെന്നുള്ള രേഖയും കുടുംബത്തിന്റെ കയ്യിലുണ്ട്.
അതേസമയം, സംഭവത്തെക്കുറിച്ച് അന്വേഷിക്കുമെന്ന് മന്ത്രി കടകംപ്പള്ളി സുരേന്ദ്രന് പ്രതികരിച്ചു. സംഭവത്തിന്റെ ദൃശ്യങ്ങള് സമൂഹമാധ്യമങ്ങളില് പ്രചരിച്ച് വിവാദമായതോടെ് മന്ത്രി കുടുംബത്തെ സന്ദര്ശിച്ചിരുന്നു. പരാതി ലഭിച്ചിട്ടും പോലീസ് നടപടി എടുക്കാത്തത് ഗൗരവമുള്ള വിഷയമാണെന്നും അതിനെക്കുറിച്ചും അന്വേഷിക്കുമെന്നും മന്ത്രി പറഞ്ഞു.
പുറമ്പോക്ക് ഭൂമിയില് കുടില് കെട്ടിയാല് അധികാരികള്ക്ക് പരാതി നല്കാം. കുടില് പൊളിക്കാനുള്ള അധികാരം ആര്ക്കുമില്ല. കുടില് കെട്ടിയ സര്ക്കാര് ഭൂമി അളന്നുതിരിച്ച് സംരക്ഷിക്കാനുള്ള നടപടികള് സ്വീകരിക്കാന് ബന്ധപ്പെട്ട ഉദ്യോഗസ്ഥര്ക്ക് നിര്ദ്ദേശം നല്കുമെന്നും മന്ത്രി പറഞ്ഞു.