കോഴിക്കോട്: ഉദ്ഘാടന പരിപാടിക്ക് വാഹനത്തിന്റെ മുകളില് കയറിയിരുന്നു ബോബി ചെമ്മണ്ണൂര് മാസ് എന്ട്രി നടത്തിയ സംഭവത്തില് നടപടി. വാഹന ഉടമക്ക് നോട്ടീസ് നല്കാന് നിയമനടപടി തുടങ്ങി. കോഴിക്കോട് തുടങ്ങിയ ആധുനിക ഇറച്ചിക്കടയായ ബോചെ ദി ബുച്ചറിന്റെ ഉദ്ഘാടനത്തിനാണ് മോട്ടോര് വാഹന വകുപ്പിന്റെ ചട്ടങ്ങള് ലംഘിച്ച് ഇറച്ചിവെട്ടുകാരനെ പോലെ ബോബി ചെമ്മണ്ണൂരെത്തിയത്.
ചട്ടലംഘനം ചൂണ്ടിക്കാട്ടി നിരവധി പേര് രംഗത്തെത്തിയതോടെ തനിക്കെതിരെ കേസെടുക്കണമെന്ന് ബോബി ചെമ്മണ്ണൂര് തന്നെ ആവശ്യപ്പെട്ടു. സോഷ്യല്മീഡിയയിലൂടെയാണ് ബോബി ചെമ്മണ്ണൂര് ഇക്കാര്യം ആവശ്യപ്പെട്ടത്. തനിക്കെതിരെ കേസെടുക്കുമ്പോള് ചിലര്ക്ക് സന്തോഷമുണ്ടായേക്കാം എന്നാല് അത് താന് കാര്യമാക്കുന്നില്ലെന്ന് ബോബി ചെമ്മണ്ണൂര് പറഞ്ഞു.
തെറ്റുകള് ചെയ്തിട്ടും താന് ശിക്ഷിക്കപ്പെടാതെ പോയിട്ടുണ്ട്. എന്നാല് ആരോപണ വിധേയനായി ശിക്ഷിക്കപ്പെട്ടിട്ടുണ്ടെന്നും ബോബി ചെമ്മണ്ണൂര് പറഞ്ഞു. ഫൈനായാലും ജയിലായാലും പൂര്ണമനസ്സോടെ സ്വീകരിക്കുമെന്ന് ബോബി ചെമ്മണ്ണൂര് പ്രതികരിച്ചു.
അതേസമയം, സ്ഥിരമായി ബോബി ചെമ്മണ്ണൂര് ഇത്തരം നിയമ ലംഘനം നടത്തുന്നതായി മോട്ടോര് വാഹന വകുപ്പ് ഉദ്യോഗസ്ഥര് പറയുന്നു. എന്ഫോഴ്സ്മെന്റ് ആര്ഡിഒ ഉടന് നോട്ടീസ് വാഹന ഉടമയ്ക്ക് കൈമാറും. സംഭവ സമയത്ത് വാഹനമോടിച്ച ആള്ക്ക് എതിരെ നടപടി ഉണ്ടാകുമെന്ന് മോട്ടോര് വാഹന വകുപ്പ് വ്യക്തമാക്കി.
അപകടകരമായ രീതിയില് വാഹനം ഓടിച്ചതിനും ട്രാഫിക് നിയമം ലംഘിച്ചതിനുമാണ് നടപടി. ഇത്തരം പ്രകടനങ്ങള് പൊതുജനങ്ങള്ക്ക് ബുദ്ധിമുട്ട് ഉണ്ടാക്കുമെന്നും യുവാക്കളില് തെറ്റായ പ്രേരണ സൃഷ്ടിക്കുമെന്നും ഉദ്യോഗസ്ഥര് പറഞ്ഞു. സംഭവത്തിന്റെ വീഡിയോ സോഷ്യല്മീഡിയയില് വ്യാപകമായി പ്രചരിച്ചിരുന്നു.