പാരിപ്പള്ളി: വാഹനം ഉരഞ്ഞത് ചോദ്യം ചെയ്ത ക്രൈംബ്രാഞ്ച് ഇന്സ്പെക്ടറെ നടുറോഡില് വെച്ച് ക്രൂരമായി മര്ദിച്ച് മൂന്നംഗ സംഘം. കൊല്ലം പരവൂര് സ്വദേശിയും തിരുവനന്തപുരം ക്രൈംബ്രാഞ്ച് ഇന്സ്പെക്ടറുമായ ബിജുവിനെയാണ് മൂന്നംഗ സംഘം ക്രൂരമായി കയ്യേറ്റം ചെയ്തത്.
സംഭവത്തില് പരവൂര് പൂതക്കുളം എ എന് നിവാസില് മനു (33), കാര്ത്തികയില് രാജേഷ് (34), രാമമംഗലത്തില് പ്രദീഷ് (30) എന്നിവരെ പോലീസ് പിടികൂടി. ഞായറാഴ്ച വൈകീട്ടായിരുന്നു സംഭവം. ഇന്സ്പെക്ടര് സഞ്ചരിച്ചിരുന്ന വാഹനത്തില് മറ്റൊരു കാര് വന്ന് ഇടിച്ചത് ചോദ്യം ചെയ്തതാണ് കയ്യേറ്റത്തില് കലാശിച്ചത്.
also read: കുട്ടികളെ നോക്കാനെത്തി, ക്രൂരമായി ഉപദ്രവിച്ച് വീട്ടുജോലിക്കാരി, സിസിടിവി ദൃശ്യങ്ങള് പുറത്ത്, കേസ്
പാരിപ്പള്ളി ചിറക്കര ഗവ. ഹൈസ്കൂള് ജംഗ്ഷനില് വെച്ചായിരുന്നു മര്ദനം. പരിക്കേറ്റ ജയചന്ദ്രനെ പൊലീസ് എത്തിയാണ് ആശുപത്രിയില് പ്രവേശിപ്പിച്ചത്. റോഡില് ഉണ്ടായ ബഹളംകേട്ട് സമീപത്തെ പ്രദേശവാസികള് ഉദ്യോഗസ്ഥനെ രക്ഷപ്പെടുത്തി സമീപത്തെ വീടിന്റെ മതില്ക്കെട്ടിനുള്ളിലാക്കിയെങ്കിലും അക്രമികള് വീണ്ടും മര്ദിക്കുന്ന സാഹചര്യവും ഉണ്ടായി.
പിന്നീട് ജയചന്ദ്രന് വിവരമറിയിച്ചതിനെത്തുടര്ന്ന് സ്ഥലത്തെത്തിയ പാരിപ്പള്ളി ഇന്സ്പെക്ടര് അല്ജബ്ബാര്, സബ് ഇന്സ്പെക്ടര് അനുരൂപ് എന്നിവരുടെ നേതൃത്വത്തില് ഇന്സ്പെക്ടറെ പാരിപ്പള്ളി മെഡിക്കല് കോളേജ് ആശുപത്രിയില് പ്രവേശിപ്പിക്കുകയായിരുന്നു. പിടിയിലായവര്ക്കെതിരെ ജാമ്യമില്ലാ വകുപ്പുപ്രകാരം കേസെടുക്കുകയും ചെയ്തിട്ടുണ്ട്.