മലപ്പുറം: പൂജാരി ചമഞ്ഞ് ലക്ഷങ്ങള് തട്ടിയയാള് അറസ്റ്റില്. കൂപ്ലിക്കാട് രമേശനാണ് അറസ്റ്റിലായത്. പൂജ ചെയ്ത് നിധിശേഖരം തരാമെന്നും ചൊവ്വാദോഷം മാറ്റാമെന്നും വിശ്വസിപ്പിച്ചാണ് പലരില് നിന്നും ഇയാള് പണം തട്ടിയെടുത്തത്. ഇയാള് ഒമ്പതു മാസമായി ഒളിവിലായിരുന്നു.
ഹോട്ടലില് പാചകജോലി ചെയ്യുമ്പോഴാണ് പൊലീസ് ഇദ്ദേഹത്തെ പിടികൂടുന്നത്. പ്രത്യേക പൂജകള് നടത്തി നിധിയെടുത്ത് നല്കും, ചൊവ്വാദോഷം മാറ്റിത്തരും എന്ന് പറഞ്ഞ് ആളുകളെ വലയിലാക്കിയുള്ള തട്ടിപ്പുകളില് പെട്ടത് നിരവധി യുവതികളാണ്.
മലപ്പുറം വണ്ടൂര് സ്വദേശിയായ പെണ്കുട്ടിയുടെ പരാതിയിലാണ് നിലമ്പൂര് പൊലീസ് ഇയാളെ പിടികൂടിയത്. രമേശന് നമ്പൂതിരി, രമേശന് സ്വാമി, സണ്ണി സ്വാമി എന്നീ പേരുകളിലായിരുന്നു തട്ടിപ്പ് നടത്തിയിരുന്നത്. ജാതകവിധി പ്രകാരമുളള ചൊവ്വാദോഷം പ്രത്യേക പൂജയിലൂടെ മാറ്റാമെന്ന് വിശ്വസിപ്പിച്ച് വണ്ടൂര് സ്വദേശിനിയില് നിന്നും പ്രതി 1,10,000 രൂപയാണ് തട്ടിയെടുത്തത്.
വിവാഹം ശരിയാകാതെ വന്നതോടെയാണ് യുവതി പൊലീസില് പരാതി നല്കിയത്. വയനാട് ജില്ലയില് ഇയാള് ഇത്തരത്തില് നിരവധി തട്ടിപ്പുകള് നടത്തിയതായി കണ്ടെത്തിയിട്ടുണ്ട്.