മലപ്പുറം: മലപ്പുറത്ത് ഗൃഹനാഥന് ജീവനൊടുക്കിയ സംഭവത്തില് മുഖ്യപ്രതിയായ മകളുടെ ഭര്ത്താവ് അബ്ദുള് ഹമീദ് അറസ്റ്റില്. സ്ത്രീധനത്തിന്റെ പേരില് മകളെ ഭര്ത്താവും ബന്ധുക്കളും ചേര്ന്ന് പീഡിപ്പിച്ചതിലുള്ള മനോവിഷമത്തിലാണ് മൂസക്കുട്ടി ജീവനൊടുക്കിയത്.
ബന്ധുവീട്ടില് ഒളിവില് കഴിയുന്നതിനിടെയാണ് അബ്ദുള് ഹമീദിനെ പിടികൂടിയത്. അബ്ദുള് ഹമീദിന്റെ ഭാര്യ നല്കിയ സ്ത്രീധന പീഡന പരാതിയിലാണ് അറസ്റ്റ്. മകളുടെ ഭര്ത്താവിന്റെ മാനസിക പീഡനത്തെ തുടര്ന്നായിരുന്നു കഴിഞ്ഞ ദിവസം മൂസക്കുട്ടി ആത്മഹത്യ ചെയ്തത്.
കഴിഞ്ഞ മാസം 23നാണ് മൂസക്കുട്ടിയെ റബര് തോട്ടത്തില് തൂങ്ങിമരിച്ചനിലയില് കണ്ടെത്തിയത്. മൂസക്കുട്ടിയുടെ ഫോണ് പരിശോധിച്ചപ്പോഴാണ് ആത്മഹത്യക്ക് പിന്നിലെ കാരണം വ്യക്തമായത്. മകളെ ഉപദ്രവിക്കുന്നതിലുള്ള ദുഃഖം വിഡിയോയായി ചിത്രീകരിച്ച ശേഷമായിരുന്നു മരണം.
”മകളെ ഭര്ത്താവ് അബ്ദുള് ഹമീദ് ക്രൂരമായി പീഡിപ്പിക്കുന്നു. എന്റെ വേദന കേരളം ഏറ്റെടുക്കണം. പത്ത് പവന് നല്കാതെ മകളെ വേണ്ടെന്ന് ഭര്ത്താവ് പറയുന്നു” എന്നാണ് മൂസക്കുട്ടി വീഡിയോയില് പറയുന്നത്. വിഡിയോ ചിത്രീകരിച്ചശേഷം വീടിനു സമീപത്തെ റബര് തോട്ടത്തില് മൂസക്കുട്ടി തൂങ്ങിമരിക്കുകയായിരുന്നു.
മൂസക്കുട്ടിയുടെ മകള് ഹിബയും ഒതായി തെഞ്ചേരി സ്വദേശി അബ്ദുള് ഹമീദും 2020 ജനുവരി 12നാണ് വിവാഹിതരായത്. വിവാഹ സമയത്ത് നല്കിയ 18 പവന്റെ സ്വര്ണാഭരണങ്ങള് പോരെന്ന് പറഞ്ഞപ്പോള് ആറ് പവന് വീണ്ടും മൂസക്കുട്ടി നല്കി.
എന്നാല് പത്ത് പവന് കൂടി നല്കിയാലെ പ്രസവിച്ചു കിടക്കുന്ന ഹിബയേയും കുഞ്ഞിനേയും കൂട്ടിക്കൊണ്ടുപോകൂ എന്ന് പറഞ്ഞ് ഹമീദ് വഴക്കുണ്ടാക്കി. ഇത് നല്കാന് മൂസക്കുട്ടിക്ക് കഴിഞ്ഞിരുന്നില്ല.