തിരുവനന്തപുരം: സംസ്ഥാനത്തെ എടിഎമ്മുകളിലേക്ക് പണം കൊണ്ടുപോകുന്നത് സുരക്ഷാ മാനദണ്ഡങ്ങള് പാലിക്കാതെയെന്ന് റിപ്പോര്ട്ട്. സമയക്രമം നോക്കാതെയും
ഗണ്മാനില്ലാതെയുമാണ് മിക്ക ഏജന്സികളും എടിഎമ്മുകളിലേക്ക് പണം എത്തിക്കുന്നത്.
റിസര്വ്വ് ബാങ്ക് ഓഫ് ഇന്ത്യയുടെ ചട്ടപ്രകാരം ഗ്രാമപ്രദേശങ്ങളില് വൈകീട്ട് 6 മണിക്കു ശേഷവും നഗരങ്ങളില് 9 മണിക്കു ശേഷവും എടിഎമ്മുകളിലേക്ക് പണം നിറയ്ക്കാന് കൊണ്ടുപോകരുത്. ഒരു കോടിയ്ക്കു മുകളിലാണ് തുകയെങ്കില് നിര്ബന്ധമായും ഗണ്മാന് കൂടെയുണ്ടായിരിക്കണം. എന്നിങ്ങനെയാണ് എടിഎമ്മുകളിലേക്ക് പണം കൊണ്ടു പോകാനുള്ള നിര്ദേശങ്ങള്. എന്നാല് ഇവയൊന്നും പാലിക്കാതെയാണ് മിക്ക എടിഎമ്മുകളിലും പണം നിറയ്ക്കാന് കൊണ്ട് പോകുന്നത്.
ബാങ്കുകള് വിവിധ ഏജന്സികളെയാണ് പണം നിറയ്ക്കാന് ഏല്പ്പിച്ചിരിക്കുന്നത്. എന്നാല് ഇവര് ഈ മാനദണ്ഡങ്ങള് പാലിക്കുന്നതില് വരുത്തുന്നത് കനത്ത അലംഭാവമാണ്. 2ഉം 3 ഉം കോടി രൂപയുമായി പോകുന്ന വാഹനത്തില് ഡ്രൈവര്ക്കൊപ്പം ഒരു സഹായി മാത്രമാണ് ഉണ്ടാവുക. ഗണ്മാന് കൂടെവേണമെന്ന നിര്ദേശത്തിന് പുല്ലുവില കല്പ്പിച്ചാണ് ഏജന്സികളുടെ പ്രവര്ത്തനം. റോഡരികില് വര്ക്ക് ഷോപ്പ് മുതല് എവിടെയും നിര്ത്തിയാണ് വാഹനം കടന്നു പോകുന്നത്. കഴിഞ്ഞ ദിവസം തൃശൂര് വടക്കാഞ്ചേരിയില് പണം കൊണ്ടുപോകുന്ന വാഹനത്തിനു നേരെ ആക്രമണം ഉണ്ടായത് ഏറെ ഗൗരവത്തോടെയാണ് പോലീസ് കാണുന്നത്.