ന്യൂഡല്ഹി: പുറത്തു നിന്നുള്ള ഭക്ഷണം കൊണ്ടുവരുന്നത് തീയ്യേറ്ററുകള് വിലക്കുന്നത് എന്ത് അടിസ്ഥാനത്തിലാണെന്ന് കോടതി. സംസ്ഥാന സര്ക്കാരും തീയ്യേറ്റര് ഉടമകളും ഉടന് മറുപടി പറയണമെന്ന് കോടതി അറിയിച്ചു. മുംബൈ, ഡല്ഹി ഹൈക്കോടതികളില് സമര്പ്പിക്കപ്പെട്ട പൊതുതാല്പര്യ ഹര്ജികള് പരിഗണിക്കവേയാണ് കോടതിയുടെ നിരീക്ഷണം.
പുറത്തുനിന്നുള്ള ഭക്ഷണം തീയ്യേറ്ററിനുള്ളില് അനുവദിക്കുന്നത് സുരക്ഷാപ്രശ്നങ്ങള് ഉണ്ടാക്കുമെന്ന് സത്യവാങ്മൂലം നല്കിയ മഹാരാഷ്ട്ര സര്ക്കാരിനെ വിമര്ശിക്കാനും കോടതി മടിച്ചില്ല. മള്ട്ടിപ്ലക്സ് തീയേറ്ററുകളില് പുറത്തുനിന്നുള്ള ഭക്ഷണവും പാനീയങ്ങളും അനിവദിക്കാത്തത് ചൂണ്ടിക്കാണിച്ചുകൊണ്ട് ജിതേന്ദ്ര ബാക്സി എന്ന വ്യക്തി നല്കിയ ഹര്ജിയാണ് മുംബൈ ഹൈക്കോടതി പരിഗണിച്ചത്.
ഡല്ഹി ഹൈക്കോടതിയില് ഹര്ജി സമര്പ്പിച്ചത് ഏക്ത സിംഗ് എന്ന അഭിഭാഷകയാണ്. പുറത്തുനിന്നുള്ള ഭക്ഷണങ്ങള് അനുവദിക്കണമെന്ന് ജമ്മുകാശ്മീര് ഹൈക്കോടതിയും അടുത്തിടെ വിധി പുറപ്പെടുവിച്ചിരുന്നു. വിമാനത്തില് പോലും പുറത്തുനിന്നുള്ള ഭക്ഷണം അനുവദിക്കുന്നുണ്ടെങ്കില് തീയേറ്ററിനുള്ളില് എന്താണ് കുഴപ്പം, കോടതി ചോദിച്ചു. നിലവില് പല തീയേറ്ററുകളില് പുറത്തുനിന്നുള്ള ഭക്ഷണം അനുവദിക്കുന്നില്ല. തീയേറ്ററിനുള്ളില് ലഭ്യമായ ഭക്ഷണത്തിന് വലിയ വിലയാണ് ഉടമകള് ഈടാക്കുന്നത്.