മുംബൈ: ദീപാവലി ബോണസ് വിതരണം ചെയ്യാത്തതില് പ്രതിഷേധിച്ച് എയര് ഇന്ത്യാ ജീവനക്കാരുടെ മിന്നല് പണിമുടക്ക്. മുംബൈ ഛത്രപതി ശിവജി വിമാനത്താവളത്തിലെ ജീവനക്കാരാണ് പണിമുടക്ക് നടത്തുന്നത്. 400 ഓളം ജീവനക്കാരാണ് ഇന്നലെ അര്ധരാത്രി മുതല് പണിമുടക്ക് ആരംഭിച്ചത്.
ജീവനക്കാര് സഹകരിക്കാത്തതിനെ തുടര്ന്ന് എയര് ഇന്ത്യാ വിമാനങ്ങള് വൈകിക്കൊണ്ടിരിക്കുന്നതായാണ് റിപ്പോര്ട്ടുകള്. പുലര്ച്ചെ 1.45 ന് പുറപ്പെടേണ്ട മുംബൈ- ബാങ്കോക്ക് ഫ്ളൈറ്റ് എട്ട് മണിക്കൂറോളം വൈകിയാണ് പുറപ്പെട്ടത്. ന്യൂആര്ക്കിലേക്കുള്ള വിമാനം മൂന്നര മണിക്കൂറും വൈകി.
മുന്കൂട്ടി അറിയിക്കാതെയാണ് ജീവനക്കാര് മിന്നല് പണിമുടക്ക് ആരംഭിച്ചതെന്നും യാത്രക്കാര്ക്ക് നേരിട്ട അസൗകര്യത്തില് ഖേദിക്കുന്നുവെന്നും എയര് ഇന്ത്യ അറിയിച്ചു. മുംബൈ വിമാനത്താവളത്തില് കുടുങ്ങിയ യാത്രക്കാരുടെ ബുദ്ധിമുട്ടുകള് എത്രയും വേഗം പരിഹരിക്കുമെന്നും എയര് ഇന്ത്യാ വക്താവ് പറഞ്ഞു.