തൃശ്ശൂര്: ലക്ഷദ്വീപ് വിഷയത്തില് തന്റെ അഭിപ്രായം തുറന്നുപറഞ്ഞ നടന് പൃഥ്വിരാജിനെതിരെ വലിയ രീതിയിലുള്ള സൈബര് ആക്രമണമാണ് ഇപ്പോള് നടന്നുകൊണ്ടിരിക്കുന്നത്. നടനെതിരെ തുടരുന്ന സൈബര് ആക്രമണത്തിലും വ്യക്തിഹത്യയിലും എതിര്പ്പറിയിച്ച് ഇതിനോടകം സിനിമാരംഗത്തെ നിരവധി പേര് രംഗത്തെത്തിയിരുന്നു.
ഇപ്പോഴിതാ വിഷയത്തില് പ്രതികരണവുമായി എത്തിയിരിക്കുകയാണ് സുരേഷ് ഗോപി. ലക്ഷദ്വീപ് വിഷയമോ പൃഥ്വിരാജിന്റെ പേരോ പരാമര്ശിക്കാതെയാണ് സുരേഷ് ഗോപിയുടെ അഭിപ്രായപ്രകടനം. വിമര്ശിക്കേണ്ടിവരുമ്പോള് മാന്യതയും സത്യസന്ധതയുമാവട്ടെ നിങ്ങളുടെ ആയുധങ്ങള്. സത്യസന്ധതയും മാന്യതയും കൈവിടാതിരിക്കൂ, വികാരങ്ങള് ശുദ്ധവും സത്യസന്ധവുമാവട്ടെ- എന്ന് സുരേഷ് ഗോപി ഫേസ്ബുക്കില് കുറിച്ചു.
സുരേഷ് ഗോപിയുടെ ഫേസ്ബുക്ക് കുറിപ്പ്
പ്ലീസ്, പ്ലീസ്, പ്ലീസ്… ഓരോ മനുഷ്യന്റെയും ജീവിതത്തില് സ്ഥാപനങ്ങളല്ല സ്ഥാനങ്ങളാണ് ഉള്ളത്. മുത്തശ്ശന്, മുത്തശ്ശി, അവരുടെ മുന്ഗാമികള്, അവരുടെ പിന്ഗാമികളായി അച്ഛന്, അമ്മ, സഹോദരങ്ങള് എന്നിങ്ങനെ സ്ഥാനങ്ങളാണ് ഉള്ളത്. അഭിപ്രായ സ്വാതന്ത്ര്യം എന്ന് പറയുന്നത് ജീവിതം അഭിമുഖീകരിച്ച് കൊണ്ടിരിക്കുന്ന ഒരു വ്യക്തിയുടെ സ്വാതന്ത്ര്യമാണ്.
അതില് സത്യമുണ്ടാകാം സത്യമില്ലായിരിക്കാം. വിവരമുണ്ടായിരിക്കാം വിവരമില്ലായിരിക്കാം. പ്രചരണമുണ്ടാവാം കുപ്രചരണമുണ്ടാവാം. പക്ഷെ അതിനെ പ്രതിരോധിക്കുമ്പോള് ആരായാലും ഏത് പക്ഷത്തായാലും പ്രതികരണം മാന്യമായിരിക്കണം. ഭാഷയില് ഒരു ദൗര്ലഭ്യം എന്ന് പറയാന് മാത്രം മലയാളം അത്ര ശോഷിച്ച ഒരു ഭാഷയല്ല.
അഭിപ്രായ സ്വാതന്ത്ര്യം എന്ന് പറയുന്നത് ഒരാളുടെ അവകാശമാണെങ്കില് ആ അഭിപ്രായത്തെ ഖണ്ഡിക്കുവാനുള്ള അവകാശം മറ്റൊരാളുടെ അവകാശമാണ്, അംഗീകരിക്കുന്നു. വ്യക്തിപരമായ ബന്ധങ്ങളെ വലിച്ചിഴയ്ക്കരുത്. അച്ഛന്, അമ്മ, സഹോദരങ്ങള് എല്ലാവര്ക്കുമുണ്ട്. ആ സ്ഥാനങ്ങളെല്ലാം പവിത്രവും ശുദ്ധവുമായി നിലനിര്ത്തിക്കൊണ്ട് തന്നെയാകണം വിമര്ശനങ്ങള്.
വിമര്ശനങ്ങളുടെ ആഴം നിങ്ങള് എത്ര വേണമെങ്കിലും വര്ധിപ്പിച്ചോളൂ. ഈ വേദന എനിക്ക് മനസ്സിലാകും. ഇത് ഒരു വ്യക്തിക്കും പക്ഷത്തിനുമുള്ള ഐക്യദാര്ഢ്യമല്ല. ഇത് തീര്ച്ചയായിട്ടും ഇന്ത്യന് ജനതയ്ക്കുള്ള ഐക്യദാര്ഢ്യമാണ്. അവര് തിരഞ്ഞെടുത്ത സര്ക്കാരിനുള്ള ഐക്യദാര്ഢ്യമാണ്.
ഇങ്ങനെയുള്ള പുലമ്പലുകള് ഏറ്റവുമധികം ഒരു മകന്റെ നേരെ ഉന്നയിച്ചപ്പോള് അതിന്റെ വേദന അനുഭവിച്ച ഒരു അച്ഛനെന്ന നിലയില് ഞാന് അപേക്ഷിക്കുന്നു! വിമര്ശിക്കേണ്ടിവരുമ്പോള് മാന്യതയും സത്യസന്ധതയുമാവട്ടെ നിങ്ങളുടെ ആയുധങ്ങള്. സത്യസന്ധതയും മാന്യതയും കൈവിടാതിരിക്കൂ, വികാരങ്ങള് ശുദ്ധവും സത്യസന്ധവുമാവട്ടെ.