തിരുവനന്തപുരം: കേരളത്തില് കോവിഡ് കേസുകള് ഉയരുകയാണ്. ആഴ്ചയിലെ സ്ഥിതിവിവര കണക്കുകള് പരിശോധിച്ചപ്പോള് എറണാകുളം, തിരുവനന്തപുരം, കോട്ടയം, കോഴിക്കോട്, തൃശൂര് ജില്ലകളിലാണ് കേസുകള് കൂടുതല്. എല്ലാ ജില്ലകളും പ്രത്യേകം ശ്രദ്ധിക്കാന് ആരോഗ്യ മന്ത്രി വീണ ജോര്ജ് നിര്ദേശം നല്കി.
സംസ്ഥാനത്ത് വ്യാഴാഴ്ച മുതല് അടുത്ത ആറു ദിവസത്തേയ്ക്ക് കോവിഡിനെതിരെയുള്ള കരുതല് ഡോസ് വിതരണത്തിനായി പ്രത്യേക യജ്ഞം സംഘടിപ്പിക്കുമെന്ന് ആരോഗ്യ വകുപ്പ് മന്ത്രി അറിയിച്ചു. വ്യാഴം, വെള്ളി, തിങ്കള്, ചൊവ്വ, വ്യാഴം, വെള്ളി എന്നി ദിവസങ്ങളിലാണ് കരുതല് ഡോസ് വിതരണത്തിന് യജ്ഞം സംഘടിപ്പിക്കുന്നത്.
ഒരു ജില്ലയിലും വാക്സിന് ക്ഷാമമില്ല. 60 വയസിന് മുകളിലുള്ള പാലിയേറ്റീവ് കെയര് രോഗികള്, കിടപ്പ് രോഗികള്, വയോജന മന്ദിരങ്ങളിലുള്ളവര് എന്നിവര്ക്ക് കരുതല് ഡോസ് വീട്ടിലെത്തി നല്കുന്നതിനും മന്ത്രി നിര്ദേശം നല്കി. ആരോഗ്യ വകുപ്പിന്റെ ഉന്നതതല യോഗത്തിലാണ് മന്ത്രി നിര്ദേശം നല്കിയത്.
നിലവില് ഒമൈക്രോണിന്റെ വകഭേദമാണ് കാണുന്നത്. ഒമൈക്രോണ് വകഭേദത്തിന് രോഗ തീവ്രത കുറവാണെങ്കിലും പെട്ടന്ന് പകരാന് സാധ്യതയുണ്ടെന്നും കോവിഡ് ബാധിക്കാതിരിക്കാന് എല്ലാവരും കോവിഡ് മാര്ഗനിര്ദേശങ്ങള് കൃത്യമായി പാലിക്കേണ്ടതാണെന്നും മന്ത്രി പറഞ്ഞു.