നെതര്‍ലന്‍ഡ്‌സില്‍ എച്ച്‌ഐവി വൈറസിന്റെ അതിമാരക വകഭേദം പതിറ്റാണ്ടുകളായി പകരുന്നുവെന്ന് ഗവേഷകരുടെ കണ്ടെത്തല്‍. രോഗബാധിതരായ 100ലധികം ആളുകളില്‍ നടത്തിയ വിശദമായ പഠനത്തിന്റെ റിപ്പോര്‍ട്ടാണിത്. വി ബി വകഭേദം എന്നാണ് ഈ പുതിയ വകഭേദം അറിയപ്പെടുന്നത്.
ഈ പുതിയ വകഭേദം ഇതുവരെ 109 പേരെ ബാധിച്ചിട്ടുണ്ടെന്ന് ഓക്‌സ്‌ഫോര്‍ഡ് യൂണിവേഴ്‌സിറ്റി നടത്തിയ ഒരു പഠനത്തില്‍ വ്യക്തമാകുന്നു. ഒരു വ്യക്തിയുടെ രക്തത്തിലെ വൈറല് കണങ്ങളുടെ എണ്ണം വര്‍ദ്ധിപ്പിക്കുകയും അവരില്‍ നിന്ന് വൈറസ് പകരാനുള്ള സാധ്യത വര്‍ദ്ധിപ്പിക്കുകയും ചെയ്യുന്നതാണ് ഈ വകഭേദമെന്നാണ് കണ്ടെത്തല്‍.
വി ബി വകഭേദം എന്നറിയപ്പെടുന്ന എച്ച്‌ഐവി വൈറസിന്റെ മറ്റ് വകഭേദങ്ങള്‍ ബാധിച്ചവരേക്കാള്‍ വളരെ വേഗത്തില്‍ അത് എയ്ഡ്‌സായി വികസിക്കാനുള്ള കഴിവും ഇപ്പോള്‍ കണ്ടെത്തിയതിനുണ്ട്. രോഗപ്രതിരോധ കോശങ്ങളെ ഇത് കുറയ്ക്കുന്നു. ഈ വകഭേദത്തിന്റെ വൈറല് ലോഡും പഴയതിനെക്കാള്‍ കൂടുതലാണ്. 3.5 മുതല്‍ 5.5 വരെയാണ് ഇത്. വൈറസ് ബാധിച്ച വ്യക്തിക്ക് വളരെ വേഗം തന്നെ മറ്റൊരാളിലേക്ക് പകര്‍ന്ന് നല്‍കാന്‍ കഴിയും.
എന്നാല്‍ ചികില്‍സ ആരംഭിച്ചാല്‍ പ്രതിരോധ ശേഷി വര്‍ദ്ധിക്കുന്നതുള്‍പ്പെടെയുള്ള കാര്യങ്ങള്‍ മറ്റ് വകഭേദത്തോട് സമാനമായിരിക്കുമെന്നും ഗവേഷകര്‍ പറയുന്നു. നേരത്തെ തന്നെ ഈ വൈറസിന്റെ ബാധ കണ്ടെത്തേണ്ടതുണ്ടെന്നും പഠനം പറയുന്നു.
