വാഷിങ്ടണ്: പ്രധാനമന്ത്രി നരേന്ദ്ര മോഡിയ്ക്ക് പങ്കാളിയെ കണ്ടെത്തി തരാമെന്ന് അമേരിക്കന് പ്രസിഡന്റ് ഡൊണാള്ഡ് ട്രംപ് നര്മം കലര്ത്തി പറഞ്ഞിരുന്നതായി വെളിപ്പെടുത്തല്. വൈറ്റ് ഹൗസ് ഉദ്യോഗസ്ഥരോട് പറഞ്ഞതായാണ് വെളിപ്പെടുത്തല്. പൊളിറ്റിക്കോ മാഗസിന് പ്രസിദ്ധീകരിച്ച റിപ്പോര്ട്ടിലാണ് ഈ പരാമര്ശമുള്ളത്. വിദേശരാജ്യങ്ങളിലെ നേതാക്കളുമായുള്ള കൂടിക്കാഴ്ചയ്ക്കിടെയും അതിനു മുമ്പും ട്രംപിന് സംഭവിച്ചിട്ടുള്ള അബദ്ധങ്ങളെ കുറിച്ച് തയ്യാറാക്കിയ റിപ്പോര്ട്ടിലാണ് പൊളിറ്റിക്കോ ഇക്കാര്യം പറയുന്നത്.
കഴിഞ്ഞവര്ഷമാണ് മോഡിയും ട്രംപും കൂടിക്കാഴ്ച നടത്തിയത്. സന്ദര്ശനത്തിന് മോഡി തനിച്ചാണ് എത്തുന്നത് എന്നറിഞ്ഞപ്പോഴായിരുന്നു ട്രംപിന്റെ അഭിപ്രായപ്രകടനം. ‘ആ ഞാന് വിചാരിക്കുന്നു എനിക്ക് അദ്ദേഹത്തിന് ഒരു പങ്കാളിയെ കണ്ടെത്തിക്കൊടുക്കാന് സാധിക്കുമെന്ന്’- ട്രംപ് പറഞ്ഞു. മോഡിയുമായുള്ള കൂടിക്കാഴ്ചയ്ക്കു മുന്നോടിയായി ട്രംപ് ദക്ഷിണേഷ്യയുടെ ഭൂപടം വിശദമായി പഠിച്ചിരുന്നു. ഭൂട്ടാന്റെയും നേപ്പാളിന്റെയും പേരുകള് ട്രംപ് തെറ്റായാണ് ഉച്ചരിച്ചത്.
ഭൂട്ടാന് എന്നതിന് ബട്ടണ് എന്നാണത്രെ ട്രംപ് ഉച്ചരിച്ചത്. ഭൂട്ടാനെയും നേപ്പാളിനെയും കുറിച്ച് ട്രംപിന് ധാരണയുണ്ടായിരുന്നില്ല. ഇരു രാജ്യങ്ങളും ഇന്ത്യയുടെ ഭാഗങ്ങളാണെന്നായിരുന്നു ട്രംപ് വിചാരിച്ചിരുന്നത്- റിപ്പോര്ട്ടില് പറയുന്നു. മറ്റു നേതാക്കളുമായുള്ള ടെലഫോണ് സംഭാഷണങ്ങള്ക്കിടെയിലെ പിഴവുകള്, ഉച്ചാരണപ്പിശകുകള് തുടങ്ങിയവയും റിപ്പോര്ട്ടില് ഉള്പ്പെടുത്തിയിട്ടുണ്ട്.