തിരുവനന്തപുരം: വലിയ വിവാദമായി മാറിയ പി സി ജോര്ജിന്റെ വിദ്വേഷ പ്രസംഗം നേരിട്ട് കാണണമെന്ന് കോടതി. പിസി ജോര്ജിന്റെ പ്രസംഗം കോടതിമുറിയില് പ്രദര്ശിപ്പിക്കാന് സൗകര്യം ഒരുക്കണമെന്ന് സൈബര് പൊലീസിന് കോടതി നിര്ദേശം നല്കി.
തിരുവനന്തപുരം ജുഡീഷ്യല് മജിസ്ട്രേറ്റ് കോടതിയാണ് പൊലീസിന് നിര്ദേശം നല്കിയത്. പിസി ജോര്ജിന്റെ ജാമ്യം റദ്ദാക്കണമെന്ന് ആവശ്യപ്പെട്ടുകൊണ്ടുള്ള സര്ക്കാരിന്റെ ഹര്ജി പരിഗണിക്കവെയാണ് കോടതി ഇക്കാര്യം അറിയിച്ചത്. പി സി ജോര്ജ് നടത്തിയ മതവിദ്വേഷ പ്രസംഗത്തിന്റെ ഡിവിഡി കോടതിക്ക് പ്രോസിക്യൂഷന് കൈമാറിയിരുന്നു.
ഈ പ്രസംഗം കാണാന് തിങ്കളാഴ്ച ഉച്ചയ്ക്ക് 12 മണിക്ക് സൗകര്യം ഒരുക്കാനാണ് ജുഡീഷ്യല് ഒന്നാം ക്ലാസ് മജിസ്ട്രേറ്റ്-രണ്ട് നിര്ദേശം നല്കിയത്. തിരുവനന്തപുരത്ത് നടന്ന അനന്തപുരി ഹിന്ദുമഹാ സംഗമം എന്ന പരിപാടിയില് വെച്ചാണ് പി സി ജോര്ജ് മതവിദ്വേഷ പ്രസംഗം നടത്തിയത്.
തനിക്കെതിരെ കേസെടുത്തത് രാഷ്ട്രീയപ്രേരിതമായിട്ടാണെന്നും, അഭിപ്രായ സ്വാതന്ത്ര്യത്തിന്റെ അടിസ്ഥാനത്തിലാണ് പ്രസംഗം നടത്തിയതെന്നുമാണ് പി സി ജോര്ജിന്റെ വാദം. എന്നാല് ജനാധിപത്യ മര്യാദകള് പാലിക്കാത്ത പി സി ജോര്ജ്, ജാമ്യവസ്ഥ ലംഘിച്ച് കോടതിയെ പോലും വെല്ലുവിളിക്കുകയാണെന്നും പ്രോസിക്യൂഷന് ആരോപിച്ചു.