കണ്ണൂര്: കണ്ണൂരില് മദ്യപിച്ചുണ്ടായ തര്ക്കത്തിനിടെ ജ്യേഷ്ഠന് അനുജനെ കഴുത്ത് ഞെരിച്ച് കൊന്നു. കേളകം സ്വദേശി അഭിനേഷാണ് (39) കൊല്ലപ്പെട്ടത്. സംഭവത്തില് സഹോദരന് അഖിലേഷിനെ പൊലീസ് കസ്റ്റഡിയിലെടുത്തു. ഇന്ന് വൈകിട്ട് 4.30 ഓടെയാണ് സംഭവം.
കേളകം വെണ്ടേക്കുംചാല് പള്ളിപ്പാടം സ്വദേശികളാണ് ഇരുവരും. ഇരുവരും മദ്യപിച്ചിരുന്നതായി നാട്ടുകാര് പറയുന്നു. കേളകം കമ്പിപ്പാലത്തിന് സമീപത്തെ പുഴയരികില് ഇരുവരും സംസാരിച്ചിരിക്കുന്നത് ചിലര് കണ്ടിരുന്നു. പിന്നീട് വാക്കു തര്ക്കമുണ്ടാവുകയും അഖിലേഷ് സഹോദരന് അഭിനേഷിനെ കൊലപ്പെടുത്തുകയുമായിരുന്നുവെന്ന് പൊലീസ് പറയുന്നു.
ഉടുത്തിരുന്ന മുണ്ട് അഴിച്ച് അഭിനേഷിന്റെ കഴുത്തില് കുരുക്കിയാണ് കൊലപാതകം നടത്തിയത്. പിന്നീട് സഹോദരനെ കൊന്ന വിവരം അഖിലേഷ് തന്നെയാണ് കേളകം പൊലീസില് വിളിച്ച് അറിയിച്ചത്. തുടര്ന്ന് പൊലീസ് നടത്തിയ പരിശോധനയിലാണ് പുഴയരികില് മൃതദേഹം കണ്ടത്.
അഭിനേഷിന്റെ മൃതദേഹം പോസ്റ്റ്മോര്ട്ടത്തിനായി കണ്ണൂര് ഗവ. മെഡിക്കല് കോളേജ് ആശുപത്രിയിലേക്ക് മാറ്റി. അഖിലേഷിനെ ചോദ്യം ചെയ്ത് വരികയാണെന്ന് പൊലീസ് പറഞ്ഞു.