തിരുവനന്തപുരം: കേരളത്തില് വരുംദിവസങ്ങളില് മഴ കനക്കുമെന്ന മുന്നറിയിപ്പ്. ബംഗാള് ഉള്ക്കടലില് തെക്കന് ആന്ഡമാന് കടലില് ചക്രവാതച്ചുഴി രൂപപ്പെട്ടതായി കേന്ദ്ര കാലാവസ്ഥ വകുപ്പ് അറിയിച്ചു. വെള്ളിയാഴ്ചയോടെ ഇത് ന്യൂനമര്ദ്ദമായും തുടര്ന്നുള്ള 48 മണിക്കൂറില് വടക്ക് പടിഞ്ഞാറു ദിശയില് സഞ്ചരിച്ചു തീവ്ര ന്യൂനമര്ദ്ദമായി കൂടുതല് ശക്തിപ്രാപിക്കാനും സാധ്യതയുണ്ട്.
ഈ സാഹചര്യത്തില് കേരളത്തില് വരുന്ന അഞ്ച് ദിവസം ഇടിയോട് കൂടിയ മഴക്ക് സാധ്യതയുണ്ടെന്ന് കാലാവസ്ഥാ നിരീക്ഷണ വകുപ്പ് അറിയിച്ചു. തെക്കേ ഇന്ത്യയ്ക്കു മുകളിലെ ന്യൂനമര്ദ പാത്തി, കിഴക്ക് പടിഞ്ഞാറന് കാറ്റുകളുടെ സംയോജനം എന്നിവയുടെ സ്വാധീനവും മഴക്ക് കാരണമാകും.
also read: സ്വര്ണ്ണവില കുത്തനെ താഴേക്ക്, ഒരാഴ്ചക്കിടെ കുറഞ്ഞത് 1600 രൂപ, ഇന്നത്തെ വില ഇങ്ങനെ
കേന്ദ്ര കാലാവസ്ഥ വകുപ്പിന്റെ IMD-GFS മോഡല് പ്രകാരം ഇന്ന് കേരളത്തില് വ്യാപകമായ മഴക്ക് സാധ്യത. കാസര്കോട്, വയനാട്, കോഴിക്കോട്, മലപ്പുറം, പാലക്കാട്,ജില്ലകളില് ശക്തമായ മഴക്കും സാധ്യതയുണ്ട്. വരുന്ന ചൊവ്വാഴ്ച കേരളത്തില് ഒറ്റപ്പെട്ട ശക്തമായ മഴയ്ക്കു സാധ്യതയെന്നും കേന്ദ്ര കാലാവസ്ഥ വകുപ്പ് അറിയിച്ചു.
മധ്യ -കിഴക്ക് ബംഗാള് ഉള്ക്കടല്, വടക്കന് ആന്ഡമാന് കടലിനോട് ചേര്ന്നുള്ള മേഖലകളിലും തെക്ക് ആന്ഡമാന് കടലിലും മണിക്കൂറില് 40-50 കിലോമീറ്റര് വേഗത്തിലും ചില അവസരങ്ങളില് 60 കിലോമീറ്റര് വേഗത്തിലും ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്.