നെയ്യാറ്റിന്കര: ‘കുളിക്കാന് ഒരു സോപ്പു വാങ്ങിത്തരുമോ’ എന്നു ചോദിച്ച യാചകനെ സോപ്പുവാങ്ങി വന്ന് കുളിപ്പിച്ച് പൊലീസുകാരന്. നെയ്യാറ്റിന്കര പൊലീസ് സ്റ്റേഷനിലെ ട്രാഫിക് പൊലീസുകാരനും പൂവാര് വിരാലി സ്വദേശിയുമായ എസ്.ബി. ഷൈജുവാണ് വയോധികനെ കുളിപ്പിച്ചത്.
നെയ്യാറ്റിന്കര ശ്രീകൃഷ്ണ സ്വാമി ക്ഷേത്രത്തിനു സമീപമാണു സംഭവം. ഇന്നലെ ഉച്ചയ്ക്കു പന്ത്രണ്ടരയോടെ ഗതാഗതം നിയന്ത്രിക്കുന്നതിനിടെയാണ് വളരെ പതുക്കെ നടന്നു വരികയായിരുന്ന വയോധികനെ ഷൈജു കാണുന്നത്. വയോധികന്റെ സമീപത്തു ചെന്ന് ‘റോഡ് മുറിച്ചു കടക്കേണ്ടതുണ്ടോ’ എന്നു ചോദിച്ചു.
പക്ഷേ, മറുപടി ‘കുളിക്കാന് ഒരു സോപ്പു വാങ്ങിത്തരാമോ’ എന്നതായിരുന്നു. പിന്നാലെ വയോധികന് നാണയത്തുട്ടുകള് ഷൈജുവിനു നേരെ നീട്ടി. ഇതോടെയാണ് വയോധികന് കുളിക്കാന് ആഗ്രഹിക്കുന്നതായി ഷിജുവിനു മനസ്സിലായത്. തുടര്ന്ന് ഒരു സോപ്പുവാങ്ങിക്കൊടുത്തു.
പിന്നാലെ സമീപത്തെ ഇടവഴിയില് നിന്ന് കുളിക്കാന് സൗകര്യമൊരുക്കിയും കൊടുത്തു. 80 വയസ്സോളമുള്ള അദ്ദേഹത്തിനു കപ്പില് വെള്ളം കോരി കുളിക്കാനുള്ള ത്രാണിയില്ലെന്നു മനസ്സിലാക്കിയ ഷൈജു, മറ്റൊന്നും ആലോചിക്കാതെ അദ്ദേഹത്തെ സോപ്പു തേപ്പിച്ചു നന്നായി കുളിപ്പിച്ചു.
കണ്ടു നിന്ന ചിലര് വാങ്ങിക്കൊടുത്ത തോര്ത്തു മുണ്ട് ഉപയോഗിച്ചു തോര്ത്തി. ശരീരവും തുടച്ചു വൃത്തിയാക്കി. കുറച്ചു പുതിയ വസ്ത്രവും പണവും നല്കിയാണ് വയോധികനെ യാത്രയാക്കിയത്. ഇതിനിടെ ആരോ ക്ലിക് ചെയ്ത ഷിജു വയോധികനെ കുളിപ്പിക്കുന്ന ചിത്രം സാമൂഹിക മാധ്യമങ്ങളില് തരംഗമാണ്. നിരവധി പേരാണ് ഷൈജുവിനെ പ്രശംസിച്ച് കമന്റ് ചെയ്തിരിക്കുന്നത്.