പാലക്കാട്: ഗെയിം കളിച്ച് അമ്മയുടെ അക്കൗണ്ടിലെ പണം നഷ്ടപ്പെടുത്തിയതിന്റെ വിഷമത്തില് യുവാവ് തൂങ്ങിമരിച്ചു. പാലക്കാടാണ് സംഭവം. നാട്ടുകല് അത്തിക്കോട് പണിക്കര്കളം ഷണ്മുഖന്റെ മകന് സജിത്തിനെയാണ് മരിച്ച നിലയില് കണ്ടെത്തിയത്.
സജിത്തിനെ ബുധനാഴ്ചയാണ് കിടപ്പുമുറിയിലെ ഫാനില് തൂങ്ങിമരിച്ച നിലയില് കണ്ടെത്തിയത്. ഉടനെ ജില്ലാ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. ഓണ്ലൈനായി ഗെയിം കളിച്ച് സജിത്തിന്റെ അമ്മയുടെ പേരിലുള്ള ബാങ്ക് അക്കൗണ്ടില് നിന്ന് 40,000 രൂപ നഷ്ടപ്പെട്ടിരുന്നു.
ഇതിന്റെ വിഷമത്തിലായിരുന്നു സജിത്ത്. ഇക്കാര്യം വീട്ടിലറിഞ്ഞാലുള്ള ആശങ്കയും ഭയവും കൊണ്ടായിരിക്കാം ജീവനൊടുക്കിയതെന്ന് ബന്ധുക്കള് കൊഴിഞ്ഞാമ്പാറ പോലീസിനു നല്കിയ മൊഴിയില് പറയുന്നു. അമ്മ: ധനലക്ഷ്മി. സഹോദരങ്ങള്: സത്യന്, സജിത