തൃശൂര്: ചൂണ്ടയിടുന്നതിനിടെ മീന് തൊണ്ടയില് കുടുങ്ങി മരണം മുന്നില്ക്കണ്ടയാളെ അത്ഭുതകരമായി രക്ഷപ്പെടുത്തി. തൃശ്ശൂരിലാണ് ഞെട്ടിക്കുന്ന സംഭവം. വലക്കാവ് പാറത്തൊട്ടിയില് വര്ഗീസിന്റെ തൊണ്ടയിലാണ് ചൂണ്ടയിടുന്നതിനിടെ മീന് കുടുങ്ങിയത്. ശസ്ത്രക്രിയയിലൂടെയാണ് മത്സ്യത്തെ നീക്കം ചെയ്തത്.
ചൂണ്ടയില് നിന്നും മീന് കടിച്ചുമാറ്റുന്നതിനിടയിലായിരുന്നു അപകടം സംഭവിച്ചത്. മീനിനെ തൊണ്ടയില് നിന്നും പുറത്തെടുക്കാന് ശ്രമിച്ചെങ്കിലും സാധിച്ചില്ല. പിന്നീട് ശ്വാസ തടസവും രക്തസ്രാവവും ഉണ്ടായതിനെ തുടര്ന്ന് വര്ഗീസിനെ ജൂബിലി മിഷന് ആശുപത്രിയില് പ്രവേശിപ്പിക്കുകയായിരുന്നു.
എമര്ജന്സി വിഭാഗത്തില് എത്തിച്ച് മത്സ്യം എടുക്കാന് ശ്രമിച്ചെങ്കിലും രക്തസ്രാവത്തെ തുടര്ന്ന് അതിന് സാധിച്ചിരുന്നില്ല. പിന്നീട് ശസ്ത്രക്രിയയിലൂടെയാണ് മത്സ്യം നീക്കം ചെയ്തത്. ഇഎന്ടി വിഭാഗത്തിലെ ഡോ. രാമകൃഷ്ണന് നേതൃത്വത്തിലായിരുന്നു ശസ്ത്രക്രിയ നടത്തിയത്.
ആദ്യം ട്രക്കിയോസ്റ്റമി നടത്തി ശ്വാസ തടസം മാറ്റിയശേഷമാണ് 12 സെന്റീമീറ്റര് നീളമുണ്ടായിരുന്ന മത്സ്യത്തെ നീക്കാനായത്. പത്ത് ദിവസത്തെ പരിചരണത്തിന് ശേഷം ഇന്നാണ് വര്ഗീസ് ആശുപത്രി വിട്ടത്.