ന്യൂഡല്ഹി: ഗാര്ഹിക പീഡനത്തെ കൊല്ലത്ത് ഭര്തൃവീട്ടില് ജീവനൊടുക്കിയ വിസ്മയയുടെ മരണവുമായി ബന്ധപ്പെട്ട കേസില് പ്രതി കിരണ് കുമാറിന് ജാമ്യം അനുവദിച്ചു. കേസില് വിചാരണ അന്തിമഘട്ടത്തിലേക്ക് കടന്ന സാഹചര്യത്തിലാണ് സുപ്രീംകോടതി ജാമ്യം അനുവദിച്ചത്.
വിസ്മയയുടെ മരണം കേരളക്കരയെ ഒന്നടങ്കം നടുക്കിയിരുന്നു. കഴിഞ്ഞ വര്ഷം ജൂണ് 21നായിരുന്നു സംഭവം. ശാസ്താംകോട്ട പോരുവഴിയിലെ ഭര്തൃ ഗൃഹത്തിലാണ് വിസ്മയയെ തൂങ്ങി മരിച്ച നിലയില് കണ്ടെത്തിയത്. കേസില് അറസ്റ്റിലായ വിസ്മയയുടെ ഭര്ത്താവ് കിരണ് കുമാര് ഇപ്പോഴും ജയിലിലാണ്.
വിസ്മയയുടേത് സ്ത്രീധന പീഡനത്തെ തുടര്ന്നുള്ള ആത്മഹത്യയെന്നാണ് കുറ്റപത്രം പറയുന്നത്. ആത്മഹത്യ പ്രേരണയടക്കം 9 വകുപ്പുകള് ചുമത്തിയാണ് കുറ്റപത്രം നല്കിയിരിക്കുന്നത്. കേസില് 500 പേജുള്ള കുറ്റപത്രമാണ് കോടതിയില് സമര്പ്പിച്ചത്.
102 സാക്ഷികളുണ്ട്, 92 റെക്കോര്ഡുകളും 56 തൊണ്ടിമുതലുകളുമാണ് കേസിലുള്ളത്. കേസിനെ തുടര്ന്ന് അസി. മോട്ടോര് വെഹിക്കിള് ഇന്സ്പെക്ടറായിരുന്ന കിരണ്കുമാറിനെ മോട്ടോര് വാഹന വകുപ്പിലെ ജോലിയില് നിന്നും സര്ക്കാര് പിരിച്ചുവിട്ടിരുന്നു.