ട്രാന്സ് വനിത എന്ന നിലയില് ഇവിടെ ജോലി ചെയ്തു ജീവിക്കാന് കഴിയില്ലെന്ന് അനീറ കബീര്. അതിനാല് തനിക്ക് ദയാവധം അനുവദിക്കണമെന്ന് അഭ്യര്ത്ഥിച്ച് രംഗത്തെത്തിയിരിക്കുകയാണ് ട്രാന്സ്ജെന്റര് അനീറ കബീര്. ദയാ വധത്തിനായി അപേക്ഷ നല്കാന് അഭിഭാഷകനെ ലഭ്യമാക്കി തരണമെന്നാവശ്യപ്പെട്ട് ലീഗല് സര്വ്വീസ് അതോറിറ്റിക്ക് അനീറ അപേക്ഷ നല്കിയിരിക്കുകയാണ്.
ട്രാന്സ് വനിത എന്ന നിലയില് ജോലി ചെയ്തു ജീവിക്കാന് കഴിയില്ലെന്ന് ബോധ്യമായെന്ന് നിരാശയാണ് അനീറയെ ദയാവധത്തിന് അപേക്ഷിക്കാന് പ്രേരിപ്പിച്ചത്. രണ്ട് വിഷയങ്ങളില് ബിരുദാനന്തര ബിരുദം, എം.എഡ്, സെറ്റ് യോഗ്യതയുള്ള അനീറ ഒക്ടോബര്, നവംബര് മാസങ്ങളില് മാത്രം 14 സ്ക്കൂളുകളില് താല്ക്കാലിക അധ്യാപക നിയമനത്തിന്റെ പരസ്യം കണ്ട് അപേക്ഷിരുന്നു.
എന്നാല് ട്രാന്സ്ജെന്ഡര് ആയത് കൊണ്ടുമാത്രം അവസരം നിഷേധിക്കപ്പെടുകയായിരുന്നു. സര്ക്കാര് സ്ക്കൂളില് നിന്ന് പോലും അനീറക്ക് നേരിടേണ്ടി വന്നത് മോശം അനുഭവമാണ്. പിന്നീട് പാലക്കാടെ ഒരു സര്ക്കാര് സ്ക്കൂളില് ജോലി ലഭിച്ചെങ്കിലും നവംബര് പകുതിയോടെ രാജിവെക്കേണ്ടി വന്നു.
സോഷ്യോളജി ജൂനിയര്, സീനിയര് അധ്യാപക ഒഴിവുകളിലേക്കാണ് നിയമനം നടന്നത്. ജൂനിയര് തസ്തികയില് താത്കാലികമായായിരുന്നു അനീറയ്ക്ക് നിയമനം. എന്നാല്, സീനിയര് തസ്തികയിലേക്ക് സ്ഥിരം ആളെത്തിയപ്പോള് താത്കാലികമായി ഇവിടെയുണ്ടായിരുന്നയാളെ ജൂനിയറാക്കി അനീറയെ പറഞ്ഞുവിടുകയായിരുന്നു.