കോഴിക്കോട്: പ്രമുഖ സംഗീത സംവിധായകന് കൈതപ്രം വിശ്വനാഥന് അന്തരിച്ചു. 58 വയസായിരുന്നു. അര്ബുദബാധയെ തുടര്ന്ന് കോഴിക്കോട് എംവിആര് കാന്സര് സെന്ററില് ചികിത്സയിലായിരുന്നു. ഇന്ന് ഉച്ചയോടെയായിരുന്നു അന്ത്യം. 1963ല് കണ്ണൂര് ജില്ലയിലെ പിലാത്തറക്കടുത്തുള്ള കൈതപ്രം എന്ന ഗ്രാമത്തില് കണ്ണാടി ഇല്ലത്ത് കേശവന് നമ്പൂതിരിയുടേയും (കണ്ണാടി ഭാഗവതര്), അദിതി അന്തര്ജ്ജനത്തിന്റെയും ഇളയ മകനായാണ് ജനനം.
തിരുവനന്തപുരത്തെ സ്വാതിതിരുനാള് സംഗീത കോളേജില് നിന്നും ഗാനഭൂഷണം നേടി. ജ്യേഷ്ഠനായ കൈതപ്രം ഗാനരചനയും സംഗീതവും നിര്വഹിച്ച ദേശാടനം എന്ന ചലച്ചിത്രത്തില് സഹായിയായിട്ടായിരുന്നു ചലച്ചിത്ര രംഗത്തേക്കുള്ള വരവ്. ജയരാജ് സംവിധാനം ചെയ്ത കണ്ണകി എന്ന ചലച്ചിത്രത്തിലൂടെ സ്വതന്ത്ര സംഗീതസംവിധായകനായി.
കരിനീലക്കണ്ണഴകീ, കൈയ്യെത്തും ദൂരെ ഒരു കുട്ടിക്കാലം, നീയൊരു പുഴയായ്, എനിക്കൊരു പെണ്ണുണ്ട്, സാറേ സാറേ സാമ്പാറേ, ആടെടീ ആടാടെടീ ആലിലക്കിളിയേ തുടങ്ങിയവ കൈതപ്രം വിശ്വനാഥന്റെ ശ്രദ്ധേയമായ ഗാനങ്ങളാണ്. കണ്ണകി, തിളക്കം, ദൈവനാമത്തില്, ഉള്ളം, ഏകാന്തം, മധ്യവേനല്, നീലാംബരി, ഓര്മ്മ മാത്രം എന്നീ ചിത്രങ്ങളിലാണ് സംഗീത സംവിധാനം നിര്വഹിച്ചത്.
കണ്ണകി എന്ന ചിത്രത്തിലെ പശ്ചാത്തല സംഗീതത്തിന് സംസ്ഥാന പുരസ്കാരം ലഭിച്ചിരുന്നു. ഭാര്യ-ഗൗരി. മക്കള്:അതിഥി, നര്മദ, കേശവന്.