കൊല്ലം: പ്രാര്ത്ഥനയ്ക്കിടെ ഉറങ്ങിപ്പോയെന്ന് ആരോപിച്ച് കൊല്ലം അഞ്ചലിലെ അനാഥാലയത്തില് വയോധികയ്ക്ക് ചൂരല് കൊണ്ട് ക്രൂരമര്ദ്ദനം. സംഭവത്തില് സ്ഥാപന നടത്തിപ്പുകാരനെതിരെ പോലീസ് കേസെടുത്തു. അഞ്ചല് അര്പ്പിത സ്നേഹാലയം നടത്തിപ്പുകാരന് അഡ്വ. സജീവനെതിരെയാണ് പോലീസ് കേസെടുത്തത്.
ഇയാള് അനാഥാലയത്തിലെ അന്തേവാസികളെ ചൂരല് കൊണ്ട് മര്ദിക്കുന്ന ദൃശ്യങ്ങള് സോഷ്യല്മീഡിയയില് നിറഞ്ഞിരുന്നു. കഴിഞ്ഞ ഓഗസ്റ്റില് നടന്ന സംഭവത്തിന്റെ ദൃശ്യങ്ങള് സ്ഥാപനത്തിലെ മുന് ജീവനക്കാരനായ ജസ്റ്റിന് സലീമാണ് പുറത്തുവിട്ടത്. ഈ ദൃശ്യങ്ങള് സഹിതം ഡി.ജി.പി. ഉള്പ്പെടെയുള്ളവര്ക്കും ഇയാള് പരാതി നല്കിയിരുന്നു. തുടര്ന്നാണ് പോലീസ് നടപടി സ്വീകരിച്ചത്.
പ്രാര്ഥനയ്ക്കിടെ ഉറങ്ങിപ്പോയെന്ന് ആരോപിച്ചാണ് സജീവന് ചൂരല് വടി ഉപയോഗിച്ച് വയോധികയെ മര്ദിച്ചത്. മറ്റ് അന്തേവാസികളോട് കയര്ത്ത് സംസാരിക്കുന്നതും ദൃശ്യങ്ങളിലുണ്ടായിരുന്നു. അതേസമയം, താന് വയോധികയെ മര്ദിച്ചിട്ടില്ലെന്നാണ് സജീവന്റെ പ്രതികരണം. കസേരയിലാണ് അടിച്ചതെന്നും ജസ്റ്റിന് സലീമിനെ സ്ഥാപനത്തില്നിന്ന് പുറത്താക്കിയതാണ് പരാതിക്ക് പിന്നിലെ കാരണമെന്നും അദ്ദേഹം ആരോപിച്ചു.