കോഴിക്കോട്: കേരളത്തില് പലയിടത്തും അതിശക്തമായ മഴ തുടരുകയാണ്. കോഴിക്കോട് ജില്ലയില് രണ്ടിടത്ത് മണ്ണിടിച്ചിലുണ്ടായി. കുറ്റ്യാടി ചുരം റോഡില് ഉരുള്പൊട്ടി. കുറ്റ്യാടിയില് വ്യാപകകൃഷിനാശമുണ്ടായി. കുറ്റ്യാടി, മരുതോംകര, കായക്കൊടി, കാവിലുംപാറ പ്രദേശങ്ങളിലെ താഴ്ന്ന ഇടങ്ങള് വെള്ളത്തിനടിയിലായി.
അടിവാരത്ത് ശക്തമായ മലവെള്ളപ്പാച്ചിലാണ് ഉണ്ടായത്. അടിവാരം ടൗണില് വെള്ളപ്പൊക്കമുണ്ടായി. നഗരത്തിലെ കടകളില് പലതിലും വെള്ളം കയറി. മണ്ണിടിച്ചിലിന്റെ ഭാഗമായാണ് അടിവാരം ടൗണിലേക്ക് വലിയ തോതില് മലവെള്ളപ്പാച്ചില് ഉണ്ടായതെന്നാണ് റിപ്പോര്ട്ട്.
കോഴിക്കോട്- വയനാട് ദേശീയ പാതയില് ഗതാഗതം സ്തംഭിച്ചു. കനത്ത മഴയില് ഗ്രാമീണ മേഖലകളിലും വെള്ളം ഉയരുന്ന സാഹചര്യമാണുള്ളത്. കോഴിക്കോട് ബാലുശേരി കുറുമ്പൊയില് തോരാട് മലയിലും ഉരുള് പൊട്ടലുണ്ടായതായി റിപ്പോര്ട്ടുണ്ട്. കോഴിക്കോട് നഗരത്തിലും ശക്തമായ മഴയാണ് പെയ്യുന്നത്.