തൊടുപുഴ: ഇടുക്കി അണക്കെട്ട് തുറക്കുന്നതിന് മുന്നോടിയായി രാവിലെ 10.55 ന് സൈറണ് മുഴക്കും. രാവിലെ 11മണിക്കാണ് ഷട്ടറുകള് ഉയര്ത്തുക. ജലസേചന മന്ത്രി റോഷി അഗസ്റ്റിന്, വൈദ്യുതി മന്ത്രി കെ.കൃഷ്ണന്കുട്ടി, ജില്ലാ കളക്ടര് ഷീബ ജോര്ജ് , വൈദ്യുതി ബോര്ഡ് ചീഫ് എന്ജിനീയര് സുപ്രിയ എസ്. ഡെപ്യൂട്ടി ചീഫ് എന്ജിനീയര് പ്രസന്നകുമാര്, എക്സിക്യൂട്ടീവ് ആര്.ശ്രീദേവി എന്നിവരുടെ സാന്നിദ്ധ്യത്തിലാണ് ഷട്ടര് തുറക്കുന്നത്.
ചെറുതോണി ഡാമിന്റെ മൂന്ന് ഷട്ടറുകള് ഉയര്ത്താനാണ് തീരുമാനം. ആദ്യം മൂന്നാമത്തെ ഷട്ടര് ആണ് ഉയര്ത്തുന്നത്. ചെറുതോണിയിലെ ജലനിരപ്പ് വിലയിരുത്തി അഞ്ചു മിനിറ്റിന് ശേഷം രണ്ടാമത്തെ ഷട്ടറും വീണ്ടും അഞ്ചു മിനിറ്റ് ശേഷം നാലാമത്തെ ഷട്ടറും 35 സെ.മീ. ഉയര്ത്തുമെന്ന് ജില്ല ഇന്ഫോര്മേഷന് ഓഫീസര് അറിയിച്ചു.
ചെറുതോണി ടൗണ് മുതല് പെരിയാറിന്റെ ഇരുകരകളിലുമുള്ളവര് അതീവ ജാഗ്രത പാലിക്കണമെന്ന് അധികൃതര് നിര്ദേശിച്ചു. പെരിയാറിലേക്കൊഴുക്കുന്ന ജലം 4 – 6 മണിക്കൂറിനുള്ളില് കാലടി – ആലുവ ഭാഗത്തെത്തുമെന്നാണ് വിലയിരുത്തലെന്ന് എറണാകുളം ജില്ലാ കലക്ടര് ജാഫര് മാലിക് അറിയിച്ചു.
അധിക ജലപ്രവാഹം മൂലം പെരിയാറിലെ ജലനിരപ്പ് ഒരു മീറ്ററോളം ഉയര്ന്നേക്കും. ഈ ജലനിരപ്പ് ബാധിച്ചേക്കാവുന്ന താഴ്ന്ന പ്രദേശങ്ങളിലുള്ളവര് ജാഗ്രത പുലര്ത്തേണ്ടതാണ്.