തിരുവനന്തപുരം: കേരളത്തില് പെരുമഴ തുടരുകയാണ്. പത്തനംതിട്ട മുതല് തൃശൂര് വരെ ചെറുമേഘവിസ്ഫോടനങ്ങളാണ് കനത്തമഴയ്ക്ക് കാരണം. വിവിധയിടങ്ങളില് വെള്ളം കയറി. ജനങ്ങള് ജാഗ്രത പാലിക്കണമെന്ന് അധികൃതര് അറിയിച്ചിട്ടുണ്ട്. 11 ജില്ലകളില് ഇന്ന് ഓറഞ്ച് അലേര്ട്ട് പ്രഖ്യാപിച്ചു.
ശ്രീകാര്യത്ത് എന്ജിനീയറിങ് കോളജിനു മുന്നില് മരം വീണ് ഗതാഗതം തടസപ്പെട്ടു. റാന്നി താലൂക്ക് ആശുപത്രി അത്യാഹിതവിഭാഗത്തില് വെള്ളം കയറിയതിനെ തുടര്ന്ന് രോഗികളെ മാറ്റി. റാന്നി മണിമല റോഡിലും ഇട്ടിയപ്പാറ സ്റ്റാന്ഡിലും വെള്ളക്കെട്ടായി.
തിരുവനന്തപുരം ചെമ്പകമംഗലത്ത് വീടിന്റെ ചുമരിടിഞ്ഞ് നാലുപേര്ക്ക് പരുക്കേറ്റു. അങ്കമാലിയിലും കാലടിയിലും മലയാറ്റൂര് റോഡിലും വെള്ളം കയറി. കോട്ടയം കൂട്ടിക്കല് ഇളംകാട് ഭാഗത്ത് ഉരുള്പൊട്ടി വെള്ളം ഉയരുന്നു. മര്ഫി സ്കൂളില് ക്യാംപ് തുറന്നു.
കനത്ത മഴയുടെ പശ്ചാത്തലത്തില് ഏതു സാഹചര്യത്തെയും നേരിടാന് സര്ക്കാരും തദ്ദേശ സ്വയംഭരണ സ്ഥാപനങ്ങളും സജ്ജമാണെന്ന് മന്ത്രി കെ.രാജന് പറഞ്ഞു. തിരുവനന്തപുരത്ത് ഫയര്ഫോഴ്സ് കണ്ട്രോള് റൂം: 0471 2333101 . മൂന്നാര് ഗ്യാപ് റോഡ് വഴി ഗതാഗതം നിരോധിച്ചു. ഇടുക്കി തോട്ടം മേഖലയില് ജോലികള് പാടില്ല, പുഴയോരങ്ങളില് ജാഗ്രത നിര്ദേശം നല്കി. നദികളില് ജലനിരപ്പുയരുന്നതിനാല് തീരത്ത് താമസിക്കുന്നവര് ജാഗ്രത പാലിക്കണമെന്ന് അറിയിച്ചു.