കോഴിക്കോട്: അലമാരയിലായാലും അയയിലിട്ടാലും വസ്ത്രങ്ങള്ക്ക് തീ പിടിക്കുന്ന അത്ഭുത പ്രതിഭാസം നാടിനെ അമ്പരപ്പിക്കുന്നു. ചേളന്നൂര് പഞ്ചായത്ത് 4ാം വാര്ഡില് പെരുമ്പൊയില് പിലാത്തോട്ടത്തില് മീത്തല് കല്യാണിയുടെ വീട്ടിലാണ് സംഭവം. കഴിഞ്ഞ ശനിയാഴ്ച ഉച്ച മുതലാണ് സംഭവങ്ങള്ക്ക് തുടക്കം. വീടിന്റെ അടുക്കള ഭാഗത്ത് അലക്കിയിട്ട തുണിയിലാണു തീ ആദ്യം കണ്ടത്.
ഇതു എങ്ങനെ എന്നു നോക്കുന്നതിനിടെ വീട്ടിനകത്ത് ഫ്രിഡ്ജിനു പുറകിലെ വസ്ത്രത്തിനു തീ പിടിച്ചു. ഇതു അണയ്ക്കുന്നതിനിടെ അലമാരയില് അടുക്കിവച്ച വസ്ത്രത്തിന്റെ ഒരു ഭാഗത്തുനിന്ന് തീ ഉയരാന് തുടങ്ങിയതോടെയാണ് അമ്പരപ്പ് നിറഞ്ഞത്. സംഭവം അറിഞ്ഞു നാട്ടുകാരും എത്തി തുടങ്ങി. ഇതിനിടെ കിടപ്പുമുറിയിലെ മറ്റൊരു അലമാരയിലും വസ്ത്രത്തിനു തീ പിടിച്ചു. തുടര്ച്ചയായി മൂന്നു ദിവസം തീ പടര്ന്നതിനാല് വീട്ടിലെ വസ്ത്രങ്ങളെല്ലാം എടുത്തു പുറത്തേക്കിടാന് പോലീസ് നിര്ദേശിച്ചു.
വീട്ടുകാരെ താല്ക്കാലികമായി മാറ്റി പാര്പ്പിക്കുകയും ചെയ്തു. വടകരയില്നിന്ന് ശാസ്ത്രീയ പരിശോധനാ വിഭാഗമെത്തി കത്തിയ വസ്ത്രത്തിന്റെ ഭാഗങ്ങള് ശേഖരിച്ചു. പ്രത്യേക ഗന്ധമോ മറ്റു സവിശേഷതകളോ അനുഭവപ്പെട്ടില്ലെന്ന് വീട്ടുകാര് പറയുന്നു. തീ കത്തുന്ന സമയത്ത് ഉടനെ വെള്ളമൊഴിച്ചു കെടുത്തും. വൈകാതെ തന്നെ സമീപത്തെ മറ്റൊരു മുറിയില് തീ പിടിക്കും. വസ്ത്രങ്ങള് പൂര്ണമായും വീട്ടില്നിന്നും എടുത്തു മാറ്റിയതിനാല് ചൊവ്വാഴ്ച തീ പിടിത്തമുണ്ടായില്ല.