തിരുവനന്തപുരം; ശമനമില്ലാതെ കോവിഡ് വ്യാപിച്ചുകൊണ്ടിരിക്കുകയാണ്. ഈ സാഹചര്യത്തില് സംസ്ഥാനത്ത് കൂടുതല് ഇളവുകളോടെ ലോക്ക്ഡൗണ് തുടര്ന്നേക്കും. ഇന്ന് വൈകിട്ട് മുഖ്യമന്ത്രിയുടെ നേതൃത്വത്തില് ചേരുന്ന അവലോകനയോഗത്തില് തീരുമാനമുണ്ടായിരിക്കും.
ലോക്ക്ഡൗണ് അവസാനിക്കുന്ന ബുധനാഴ്ചയ്ക്ക് ശേഷമാകും കൂടുതല് ഇളവുകള് വരുന്നത്. ഓട്ടോ, ടാക്സി സര്വീസുകള്ക്കും കൂടുതല് കെഎസ്ആര്ടിസി ബസ് സര്വീസുകള്ക്കും അനുമതി നല്കിയേക്കും. തുണിക്കടകള്, ചെരിപ്പുകള് വില്ക്കുന്ന കടകള് എന്നിവയ്ക്ക് തുറക്കാന് അനുമതി ഉണ്ടാകും.
കൂടുതല് ഇളവുകള് നല്കി ഘട്ടം ഘട്ടമായാവും ലോക്ക്ഡൗണ് ഒഴിവാക്കുക. കോവിഡ് വ്യാപനത്തിന് മൂന്നാംതരംഗം ഉണ്ടാകുമെന്ന മുന്നറിയിപ്പുള്ളതിനാല് ആള്ക്കൂട്ടം ഒഴിവാക്കാനുള്ള നിയന്ത്രണങ്ങള് എല്ലാമേഖലയിലും തുടരും. ശനി, ഞായര് ദിവസങ്ങളിലെ സമ്പൂര്ണ ലോക്ഡൗണിന് ശേഷം ഇന്ന് കൂടുതല് ഇളവുകള് ഉണ്ട്.
ഹോട്ടലുകളില് നിന്നും പാഴ്സലുകള് അനുവദിക്കും. നിര്മ്മാണപ്രവര്ത്തനങ്ങള്ക്കും അനുമതി ഉണ്ട്. 75 ശതമാനം ജനങ്ങളും വാക്സിന് എടുത്താലേ കോവിഡ് ഭീഷണിയില്നിന്ന് സംസ്ഥാനം മുക്തമാകൂ എന്നാണ് വിലയിരുത്തല്. ഇപ്പോള് 25 ശതമാനത്തിന് ഒരു ഡോസ് നല്കിയിട്ടുണ്ട്. 75 ശതമാനംപേരും പൂര്ണമായി വാക്സിനെടുക്കുന്നതുവരെ പ്രാദേശിക അടിസ്ഥാനത്തില് രോഗബാധ നിരീക്ഷിക്കാന് പ്രത്യേക സംവിധാനം ഏര്പ്പെടുത്താന് ആലോചിക്കുന്നു.