കാസര്കോട്: മഞ്ചേശ്വരത്ത് മത്സരിക്കാതിരിക്കാന് കെ സുരേന്ദ്രന് തനിക്ക് രണ്ടരലക്ഷം രൂപ തന്നുവെന്ന് കെ.സുരേന്ദ്രന്റെ അപരനായി പത്രിക നല്കിയ സുന്ദര. 15 ലക്ഷം രൂപയാണ് ആദ്യം വാഗ്ദാനം നല്കിയത്. ആദ്യം രണ്ടര ലക്ഷം തന്നു. ജയിച്ചു കഴിഞ്ഞാല് ബാക്കി തരാമെന്ന് സുരേന്ദ്രന് ഉറപ്പു നല്കിയതായും സുന്ദര വെളിപ്പെടുത്തി.
പ്രാദേശിക ബിജെപി നേതാക്കളാണ് വീട്ടില് പണം എത്തിച്ചതെന്നും കെ.സുരേന്ദ്രന് ഫോണില് ബന്ധപ്പെട്ടിരുന്നുവെന്നും സുന്ദര പറഞ്ഞു. 2016-ല് സ്വതന്ത്ര സ്ഥാനാര്ഥിയായി മത്സരിച്ച സുന്ദര 467 വോട്ടുകള് നേടിയിരുന്നു. അന്ന് 89 വോട്ടിനാണ് സുരേന്ദ്രന് മഞ്ചേശ്വരത്ത് പരാജയപ്പെട്ടത്.
ബിഎസ്പി സ്ഥാനാര്ത്ഥിയായിട്ടായിരുന്നു സുന്ദര നാമനിര്ദേശ പത്രിക സമര്പ്പിച്ചത്. പിന്നീട് ഇയാള് പത്രിക പിന്വലിക്കുകയായിരുന്നു. പത്രിക പിന്വലിക്കുന്നതിന്റെ തലേദിവസം ഇയാളെ കാണാനില്ലെന്ന് ബിഎസ്പി ജില്ലാ നേതൃത്വം പോലീസില് പരാതി നല്കിയിരുന്നു. തുടര്ന്ന് അടുത്ത ദിവസം ബിജെപി മഞ്ചേശ്വരം തിരഞ്ഞെടുപ്പ് കമ്മിറ്റി ഓഫീസില് പ്രത്യക്ഷപ്പെട്ട സുന്ദര അവിടെ വെച്ച് മാധ്യമങ്ങളെ കണ്ട് താന് സ്ഥാനാര്ഥിത്വത്തില് നിന്ന് പിന്മാറുകയാണെന്ന് പ്രഖ്യാപിക്കുകയായിരുന്നു.