തിരുവനന്തപുരം: കോവിഡ് വ്യാപനം അതിരൂക്ഷമായിരിക്കുന്നതിനാല് സംസ്ഥാനത്ത് കൂടുതല് നിയന്ത്രണങ്ങള് ഏര്പ്പെടുത്തി. നിലവില് വാരാന്ത്യ നിയന്ത്രണം തുടരുന്നുണ്ടെങ്കിലും അടുത്തയാഴ്ച കടുത്ത നിയന്ത്രണം തുടരുമെന്ന് മുഖ്യമന്ത്രി പിണറായി വിജയന് അറിയിച്ചു.
ചൊവ്വാഴ്ച മുതല് ഞായറാഴ്ച വരെ കടുത്ത നിയന്ത്രണങ്ങള് ഏര്പ്പെടുത്താനാണ് തീരുമാനിച്ചിട്ടുള്ളതെന്ന് മുഖ്യമന്ത്രി വാര്ത്താ സമ്മേളനത്തില് പറഞ്ഞു. നിയന്ത്രണവുമായി ബന്ധപ്പെട്ട് കൃത്യമായ മാനദണ്ഡമുണ്ടാകും. അതിന്റെ വിശദാംശങ്ങള് ഉടനെ അറിയിക്കും.
ചില കാര്യങ്ങളില് ദുരന്തനിവാരണ നിയമം അവശ്യമാണ്. അവിടങ്ങളില് അത് ഉപയോഗിക്കാന് അനുമതി നല്കിയതായും മുഖ്യമന്ത്രി പറഞ്ഞു. സംസ്ഥാനത്ത് ഓക്സിജന് ലഭ്യത ഉറപ്പുവരുത്തും. ഓക്സിജന് സിലിണ്ടര് കൊണ്ടുപോകുന്ന വാഹനത്തില് ഓക്സിജന് എമര്ജന്സി എന്ന സ്റ്റിക്കര് ധരിക്കണം.
വ്യക്തമായി കാണാവുന്ന രീതിയില് വാഹനത്തിന്റെ മുന്നിലും പിറകിലും സ്റ്റിക്കര് ഒട്ടിക്കണം. തിരക്കില് വാഹനം വേഗം കടത്തിവിടാന് ഇത് പൊലീസിനെ സഹായിക്കും. ഇക്കാര്യത്തില് സ്റ്റേഷന് ഹൗസ് ഓഫീസര്മാര് പ്രത്യേകം ശ്രദ്ധ പതിപ്പിക്കണമെന്നും മുഖ്യമന്ത്രി പറഞ്ഞു.
ഇന്ന് 38,607പേര്ക്ക് കോവിഡ് സ്ഥിരീകരിച്ചതായി മുഖ്യമന്ത്രി പിണറായി വിജയന് പറഞ്ഞു. എറണാകുളം 5369, കോഴിക്കോട് 4990, തൃശൂര് 3954, തിരുവനന്തപുരം 3940, മലപ്പുറം 3857, കോട്ടയം 3616, പാലക്കാട് 2411, കൊല്ലം 2058, ആലപ്പുഴ 2043, കണ്ണൂര് 1999, പത്തനംതിട്ട 1245, ഇടുക്കി 1153, കാസര്ഗോഡ് 1063, വയനാട് 909 എന്നിങ്ങനേയാണ് ജില്ലകളില് ഇന്ന് രോഗ ബാധ സ്ഥിരീകരിച്ചത്.