കണ്ണൂര് : കേരളത്തില് കോവിഡ് വ്യാപനം വര്ധിക്കാന് സാധ്യതയുണ്ടെന്ന് മുന്നറിയിപ്പ് നല്കി മുഖ്യമന്ത്രി പിണറായി വിജയന്. കഴിഞ്ഞ കുറച്ചുദിവസമായി കേരളത്തില് കോവിഡ് രോഗികളുടെ എണ്ണം കുറയുന്നില്ലെന്നും അതുകൊണ്ട് ജനം കൂടുതല് ശ്രദ്ധ കാട്ടേണ്ടതുണ്ടെന്നും മുഖ്യമന്ത്രി പറഞ്ഞു.
മറ്റുസംസ്ഥാനങ്ങളില് കോവിഡിന്റെ രണ്ടാം തരംഗം തുടങ്ങിയെന്ന് മുഖ്യമന്ത്രി ചൂണ്ടിക്കാട്ടി. നമ്മുടെ നാട്ടില് രോഗബാധിതരല്ലാത്ത ആളുകളാണ് കൂടുതലുള്ളതെന്നും അതിനാല് രോഗവ്യാപനത്തിനുള്ള സാധ്യത കൂടുതലാണെന്നും മുഖ്യമന്ത്രി പിണറായി വിജയന് മുന്നറിയിപ്പ് നല്കി.
രാജ്യത്ത് കോവിഡ് കേസുകളുടെ എണ്ണത്തില് വന് വര്ധനവാണ് ഉണ്ടായിരിക്കുന്നത്. ഒരുദിവസം ഏറ്റവും കൂടുതല് കോവിഡ് കേസുകള് റിപ്പോര്ട്ട് ചെയ്യുന്ന രാജ്യമായി ഇന്ത്യ വീണ്ടും മാറിയിരിക്കുകയാണ്. മറ്റു സംസ്ഥാനങ്ങളില് കോവിഡിന്റെ രണ്ടാം തരംഗം ആരംഭിച്ചിട്ടുണ്ട്. അതിനാല് നാം ജാഗ്രത പുലര്ത്തണമെന്നും മുഖ്യമന്ത്രി പറഞ്ഞു.
സംസ്ഥാനത്ത് അടുത്തതരംഗം ആരംഭിക്കുന്നതിന് മുമ്പ് പരമാവധി പേര്ക്ക് വാക്സിന് നല്കാനാണ് സര്ക്കാര് ശ്രമിക്കുന്നത്. ഇന്ത്യയില് ഏറ്റവും വേഗത്തില് വാക്സിന് വിതരണം ചെയ്യപ്പെടുന്നത് കേരളത്തിലാണ്. രോഗവ്യാപനം ഇനിയും കൂടുന്നതിന് മുമ്പ് പരമാവധി ആളുകള് വാക്സിന് സ്വീകരിക്കാന് തയ്യാറാകണമെന്നും മുഖ്യമന്ത്രി അഭ്യര്ത്ഥിച്ചു.