തിരുവനന്തപുരം: സ്ഥാനാര്ത്ഥി നിര്ണയത്തില് വ്യക്തത വരുത്താതെ കോണ്ഗ്രസ്. നിയമസഭാ തിരഞ്ഞെടുപ്പില് നേതാക്കള് പ്രധാനമായും നോക്കിക്കാണുന്ന നേമം മണ്ഡലത്തില് ആരാണ് സ്ഥാനാര്ത്ഥിയാവുന്നതെന്ന് കോണ്ഗ്രസ് വ്യക്തമാക്കിയില്ല.
എന്നാല് ഉമ്മന് ചാണ്ടി ഇല്ലെങ്കില് ശശി തരൂര് നേമം മണ്ഡലത്തില് മത്സരിക്കുന്നത് ഉചിതമെന്ന് രാഹുല് ഗാന്ധി അറിയിച്ചു. ശശി തരൂരിന്റെ സ്ഥാനാര്ത്ഥിത്വം ദേശീയ തലത്തില് ഗുണം ചെയ്യുമെന്നും രാഹുല് വ്യക്തമാക്കി. നേമത്തേക്ക് കൂടുതല് പേരെ ഹൈക്കമാന്ഡ് പരിഗണിക്കുന്നുണ്ടെന്നും വിവരം.
മുല്ലപ്പള്ളി രാമചന്ദ്രന്, വി എം സുധീരന് എന്നിവരുടെ പേരും പട്ടികയിലുണ്ട്. കെ മുരളീധരനും ശശി തരൂരും സാധ്യതാ പട്ടികയില് തുടരും. എന്നാല് നേമത്ത് ആര് എന്ന കാര്യത്തില് കൃത്യമായ മറുപടി നല്കാന് മുല്ലപ്പള്ളിയോ രമേശ് ചെന്നിത്തലയോ ഉമ്മന് ചാണ്ടിയോ തയ്യാറായിട്ടില്ല.
കഴിഞ്ഞ ദിവസം നേമത്ത് മുല്ലപ്പള്ളി രാമചന്ദ്രനെ പരിഗണിക്കുന്നതായി റിപ്പോര്ട്ട് വന്നിരുന്നു. എന്നാല് ഹൈക്കമാന്ഡ് പറയുന്നത് എന്തായാലും അതിനൊപ്പം നില്ക്കുമെന്നായിരുന്നു മുല്ലപ്പള്ളി രാമചന്ദ്രന് നേരത്തേ അറിയിച്ചിരുന്നത്.