കൊച്ചി: വരുന്ന നിയമസഭ തിരഞ്ഞെടുപ്പില് മുസ്ലീം ലീഗ് വനിതകളെ മത്സരിപ്പിക്കുന്നതിനെതിരെ പ്രതികരിച്ച് സുന്നി നേതാവ് സമദ് പൂക്കോട്ടൂര് രംഗത്ത്. കുടുംബഭാരമുള്ള ഒരു സ്ത്രീ തെരഞ്ഞെടുപ്പ് മത്സരിക്കാനിറങ്ങുന്നത് ഏറെ ബുദ്ധിമുട്ടുള്ള കാര്യമാണെന്ന് സമദ് പൂക്കോട്ടൂര് പറഞ്ഞു.
സ്ത്രീകള് മത്സരത്തിനിറങ്ങുന്നത് ശരിയല്ലെന്നും മറിച്ചു ചിന്തിച്ചാല് അനന്തരഫലം അറിയുമെന്നും സമദ് പൂക്കോട്ടൂര് കൂട്ടിച്ചേര്ത്തു. പൊതുവിഭാഗത്തിലെ സീറ്റില് വനിതകളെ മത്സരിപ്പിക്കുന്നതിലാണ് സമദ് പൂക്കോട്ടൂര് തന്റെ എതിര്പ്പ് അറിയിച്ചത്.
പൊതുമണ്ഡലത്തില് മുസ്ലീം സ്ത്രീകളെ മത്സരിപ്പിക്കാതിരിക്കുന്നതാണ് ഏറ്റവും നല്ലത്. എന്നാല് ഒഴിച്ചു കൂടാനാവാത്ത സാഹചര്യങ്ങളില് സംവരണ സീറ്റുകളില് മത്സരിപ്പിക്കാമെന്നുമാണ് എസ് വൈഎസ് സംസ്ഥാന സെക്രട്ടറി കൂടിയായ അദ്ദേഹം പറഞ്ഞു.
പൊതുവിഭാഗത്തിലെ സീറ്റില് മുസ്ലീം സ്ത്രീകളെ മത്സരിപ്പിക്കണോയെന്ന കാര്യം വീണ്ടും വീണ്ടും ചിന്തിക്കണം. കുടുംബഭാരമുള്ള സ്ത്രീ മത്സരിക്കാനിറങ്ങുന്നത് ഏറെ ബുദ്ധിമുട്ടുള്ള കാര്യമാണ്. ഇക്കാര്യത്തില് തീരുമാനം മുസ്ലീം ലീഗിനെടുക്കാം. മറിച്ചു ചിന്തിച്ചാല് അതിന്റെ അനന്തരഫലം കാത്തിരുന്ന് കാണണം- സമദ് പൂക്കോട്ടൂര് വ്യക്തമാക്കി.