ആലപ്പുഴ: അയല്വാസികള് തമ്മിലുണ്ടായ തര്ക്കത്തിനിടെ കത്തികൊണ്ട് കുത്തേറ്റ ഗൃഹനാഥന് മരിച്ചു. ആലപ്പുഴ ജില്ലയിലെ മണ്ണഞ്ചേരിയിലാണ് സംഭവം. മണ്ണഞ്ചേരി പനയ്ക്കല് പട്ടാട്ടുചിറ കുഞ്ഞുമോനാണ് മരിച്ചത്. നാല്പ്പത്തിയെട്ട് വയസ്സായിരുന്നു.
സംഭവത്തില് 22കാരിയെ പൊലീസ് കസ്റ്റഡിയിലെടുത്തു. ഞായറാഴ്ച രാത്രി പതിനൊന്നോടെയാണ് സംഭവം. സംഘര്ഷത്തില് പരിക്കേറ്റ കുഞ്ഞുമോന്റെ ഭാര്യ ബിന്ദു (45), മകള് നയന (19) എന്നിവര് സ്വകാര്യ ആശുപത്രിയില് ചികിത്സയിലാണ്.
അയല്വാസികള് തമ്മിലുള്ള വഴക്കിടുന്ന ബഹളംകേട്ട് നാട്ടുകാര് ഓടിയെത്തിയപ്പോഴേക്കും കുത്തേറ്റ് വീടിന്റെ മുന്നില് കിടക്കുന്ന കുഞ്ഞുമോനെയാണ് കണ്ടത്. ബിന്ദുവിന്റെ നെഞ്ചിലും നയനയുടെ കൈക്കും കുത്തേറ്റിട്ടുണ്ട്. സംഭവത്തില് മണ്ണഞ്ചേരി ഇന്സ്പെക്ടര് രവി സന്തോഷിന്റെ നേതൃത്വത്തില് അന്വേഷണം തുടങ്ങി.