തിരുവനന്തപുരം: കോവിഡ് വാക്സിന് സ്വീകരിക്കുന്നതിന് യാതൊരു ഭയത്തിന്റെ ആവശ്യമില്ലെന്ന് ആരോഗ്യമന്ത്രി കെകെ ശൈലജ ടീച്ചര്. വാക്സിന് വിതരണത്തിലൂടെ സംസ്ഥാനത്തെ കൊവിഡ് മരണ നിരക്ക് കുറയ്ക്കാന് കഴിയുമെന്ന് പ്രതീക്ഷിക്കുന്നതായും ശൈലജ ടീച്ചര് കൂട്ടിച്ചേര്ത്തു.
കോവിഡ് ഭീതിയില് കഴിയുന്ന കേരളത്തിന് വലിയ പ്രതീക്ഷയാണ് വാക്സിന് തരുന്നത്. അതേസമയം, ജനങ്ങളില് കോവിഡ് വാക്സിന് സ്വീകരിച്ചാലും നിലവിലെ സര്ക്കാര് മാര്ഗ നിര്ദേശങ്ങള് തുടരണമെന്നും ആരോഗ്യ മന്ത്രി കെകെ ശൈലജ ടീച്ചര് പറഞ്ഞു.
വാക്സിന് വിതരണം ഈ മാസം 16 ന് തന്നെ ആരംഭിക്കാനാകും. മുന്നൊരുക്കങ്ങള് പൂര്ത്തിയാക്കി സംസ്ഥാനം പൂര്ണ സജ്ജമാണ്. മുന്ഗണന പട്ടികയിലുള്ളവര്ക്കായിക്കും വാക്സിന് വിതരണത്തില് പ്രഥമ പരിഗണനയെന്നും രജിസ്ട്രേഷന് നടപടികള് പൂര്ത്തിയാക്കിയെന്നും ആരോഗ്യ മന്ത്രി പറഞ്ഞു.
ആദ്യ ഡോസ് വാക്സിന് സ്വീകരിച്ചാലും, 28 ദിവസം കഴിഞ്ഞുള്ള രണ്ടാം ഡോസും നിര്ബന്ധമാണ്. ഭയപ്പെടേണ്ട തരത്തിലുള്ള പാര്ശ്വഫലങ്ങള് വാക്സിന് ഇല്ലെന്നും മന്ത്രി പറഞ്ഞു. സംസ്ഥാനത്ത് വിതരണം ചെയ്യുന്നതിനുള്ള കൊവിഡ് വാക്സിന് ഇന്നലെ തന്നെ വിവിധ ജില്ലാ കേന്ദ്രങ്ങളിലേയ്ക്ക് എത്തിച്ചിരുന്നു.