പെരിന്തല്മണ്ണ: അഞ്ചുവയസ്സുകാരന് മോട്ടോര്സൈക്കിള് ഡ്രൈവിംഗ് പരിശീലനം നടത്തിയ രക്ഷിതാവിന് കിട്ടിയത് എട്ടിന്റെ പണി. കുട്ടിയെ ഡ്രൈവിങ് പഠിപ്പിച്ചതിന് രക്ഷിതാവിന്റെ ഡ്രൈവിങ് ലൈസന്സ് സസ്പെന്ഡ് ചെയ്തു. കഴിഞ്ഞ ദിവസം രാവിലെയായിരുന്നു സംഭവം.
മണ്ണാര്ക്കാട് നിന്നും പെരിന്തല്മണ്ണയിലേക്കുള്ള നാഷനല് ഹൈവേയില് കാപ്പ് എന്ന സ്ഥലത്തുനിന്നും ചേലക്കാട് എന്ന സ്ഥലത്തേക്കാണ് കുട്ടി ബൈക്കോടിച്ച് പോയത്. ചെറിയ കുട്ടിയെ മോട്ടോര് സൈക്കിള് ഹാന്ഡില് നിയന്ത്രിക്കാന് പഠിപ്പിക്കുന്നതിന്റെ ദൃശ്യങ്ങള് പുറത്തുവന്നിരുന്നു.
ഈ ദൃശ്യങ്ങള് മറ്റൊരാള് മൊബൈല് ഫോണില് പകര്ത്തുകയായിരുന്നു. ശേഷം വീഡിയോ ദൃശ്യം പെരിന്തല്മണ്ണ മോട്ടോര് വെഹിക്കിള് ഇന്സ്പെക്ടര് ബിനോയ് വര്ഗീസിന് അയച്ചു. തുടര്ന്ന് നടത്തിയ അന്വേഷണത്തിലാണ് സംഭവം വ്യക്തമായത്.
വാഹനം ഓടിച്ചിരുന്നത് തേലക്കാട് സ്വദേശി അബ്ദുല് മജീദായിരുന്നുവെന്നും ബോധ്യപ്പെട്ടു. തുടര്ന്നാണ് ഇയാളുടെ ഡ്രൈവിംഗ് ലൈസന്സ് ഒരുവര്ഷത്തേക്ക് സസ്പെന്ഡ് ചെയ്തതത്.