തിരുവനന്തപുരം: നെടുമങ്ങാട് കാണാതായ പതിനാറ് വയസ്സുകാരിയുടെ മരണം കൊലപാതകമാണെന്ന് തെളിഞ്ഞു. പതിനാറുകാരിയെ കൊലപ്പെടുത്തിയത് അമ്മയും സുഹൃത്തും ചേര്ന്ന്. ഇരുവരും ചോദ്യംചെയ്യലില് കുറ്റം സമ്മതിച്ചു. തങ്ങളുടെ ബന്ധം എതിര്ത്തതിനാലാണ് പെണ്കുട്ടിയെ കൊന്നതെന്നാണ് ഇവരുടെ മൊഴി.
പെണ്കുട്ടിയെ കിടക്കയില് തള്ളിയിട്ട് ഷാള് കുരുക്കി കൊന്നുവെന്നാണ് അമ്മ മഞ്ജുഷയും അനീഷും വെളിപ്പെടുത്തിയത്. പ്രതികളെ റിമാന്ഡ് ചെയ്തു.
ഇന്നലെ രാവിലെയാണ് നെടുമങ്ങാട് കരിപ്പൂരിലെ പൊട്ടക്കിണറ്റില് കാരാന്തല സ്വദേശിയായ പതിനാറുകാരിയുടെ മൃതദേഹം കണ്ടെത്തിയത്. എന്നാല് പെണ്കുട്ടിയുടെ അമ്മ മഞ്ജുഷ ആദ്യം നല്കിയ മൊഴിയില് കുട്ടി ആത്മഹത്യ ചെയ്തെന്നാണ് പോലീസിനോട് പറഞ്ഞത്. വഴക്കുപറഞ്ഞതിന് മകള് തൂങ്ങിമരിച്ചെന്നും മാനക്കേട് ഭയന്ന് മൃതദേഹം കിണറ്റില് കല്ലു കെട്ടി താഴ്ത്തി എന്നുമായിരുന്നു മൊഴി. എന്നാല് പോസ്റ്റ്മോര്ട്ടം റിപ്പോര്ട്ടില് പെണ്കുട്ടിയുടെ മരണം ആത്മഹത്യയല്ല, കൊലപാതകമെന്ന് തെളിഞ്ഞിരുന്നു.
പെണ്കുട്ടിയേയും അമ്മയെയും നെടുമങ്ങാട് പറണ്ടോടുളള വാടകവീട്ടില് നിന്നും കാണാതായിട്ട് രണ്ടാഴ്ചയിലേറെയായിരുന്നു. മകള് ഒളിച്ചോടിയെന്നും കുട്ടിയെ തേടി താന് തിരുപ്പതിയില് വന്നിരിക്കുകയാണെന്നും 13ന് മഞ്ജുഷ വീട്ടില് അറിയിക്കുകയായിരുന്നു.
മഞ്ജുഷയെ കുറിച്ച് പിന്നീട് വിവരമൊന്നും ഇല്ലാതായതോടെ മഞ്ജുഷയുടെ അച്ഛന് 17ന് പൊലീസില് പരാതി നല്കി. പോലീസ് അന്വേഷണത്തിനൊടുവില് മഞ്ജുഷയെയും ഇടമല സ്വദേശി അനീഷിനെയും തമിഴ്നാട്ടില് നിന്നും കണ്ടെത്തുകയായിരുന്നു.