കാസര്കോട്: കാസര്കോട് കള്ളവോട്ട് നടന്നെന്ന് കണ്ടെത്തിയ നാല് ബൂത്തുകളില് റീപോളിങ് നടത്തുമെന്ന് തെരഞ്ഞെടുപ്പ് കമ്മീഷന്. കാസര്കോട് ലോക്സഭാ മണ്ഡലത്തിലെ കല്ല്യാശ്ശേരി, തൃക്കരിപ്പൂര് എന്നീ നിയോജക മണ്ഡലങ്ങളിലെ നാല് ബൂത്തുകളിലാണ് റീപോളിങ് നടത്താനാണ് കേന്ദ്ര തിരഞ്ഞെടുപ്പ് കമ്മീഷന് നിര്ദ്ദേശിച്ചത്. ലോക്സഭാ തെരഞ്ഞെടുപ്പിന്റെ അവസാനഘട്ടമായ മെയ് 19 ( ഞായറാഴ്ച) ന് രാവിലെ ഏഴു മുതല് വൈകീട്ട് ആറു വരെയാണ് വോട്ടെടുപ്പ്.
കാസര്കോട്ടെ കല്യാശേരിയിലെ ബൂത്ത് നമ്പര് 19 പിലാത്തറ, ബൂത്ത് നമ്പര് 69 പുതിയങ്ങാടി ജുമാഅത്ത് എച്ച് എസ് നോര്ത്ത് ബ്ളോക്ക്, ബൂത്ത് നമ്പര് 70 ജുമാഅത്ത് എച്ച് എസ് സൗത്ത് ബ്ളോക്ക് എന്നിവിടങ്ങളിലും കണ്ണൂര് തളിപ്പറമ്പ് ബൂത്ത് നമ്പര് 166 പാമ്പുരുത്തി മാപ്പിള എ യു പി എസ് എന്നിവടങ്ങളിലുമാണ് റീ പോളിങ് നടത്തുന്നത്. സംസ്ഥാന ചരിത്രത്തില് ഇതാദ്യമായാണ് കള്ളവോട്ടിനെ തുടര്ന്ന് റീപോളിങ് നടക്കുന്നത്.
കള്ളവോട്ടിന്റെ ദൃശ്യങ്ങള് പുറത്ത് വിട്ട് വിവാദത്തിന് തുടക്കമിട്ടത് കോണ്ഗ്രസാണ്. കണ്ണൂര് ജില്ലയിലെ പിലാത്തറ യുപി സ്കൂളിലെ ബൂത്തില് നടന്ന കള്ളവോട്ടിന്റെ ദൃശ്യങ്ങളാണ് പുറത്തുവിട്ടത്. പിന്നാലെ ഇടതുപക്ഷവും കള്ളവോട്ട് ആരോപണവുമായി മുന്നോട്ട് വന്നു. ഇതുവരെ 17 പേര് കള്ളവോട്ട് ചെയ്തതായി സ്ഥിരീകരിച്ചിട്ടുണ്ട്. ഇതില് 13 പേര് ലീഗുകാരാണ്. 4 പേര് സിപിഎമ്മുകാരും.