ഇടുക്കി: തൊടുപുഴയില് രണ്ടാനച്ഛന്റെ ക്രൂര മര്ദ്ദനത്തിന് ഇരയായ ഏഴു വയസ്സുകാരന്റെ നില അതീവ ഗുരുതരം. തലയോട് പൊട്ടി തലച്ചോറ് പുറത്ത് വന്ന അവസ്ഥയിലാണ് കുട്ടിയെ ആശുപത്രിയില് പ്രവേശിപ്പിച്ചിരിക്കുന്നത്. മൂന്നര വയസ്സുള്ള സഹോദരനും മര്ദ്ദനമേറ്റിട്ടുണ്ട്. രണ്ടാനച്ഛന് കുട്ടിയെ നിലത്തിട്ട് പല തവണ ചവിട്ടിയെന്ന് അമ്മ പോലീസിന് മൊഴി നല്കി.
വ്യാഴാഴ്ചയാണ് സംഭവം നടന്നത്. അമ്മയും രണ്ടാനച്ഛനും പുറത്തുപോയി വന്നപ്പോള് ഇളയ കുട്ടി സോഫയില് മൂത്രമൊഴിച്ചിട്ടുണ്ടായിരുന്നു. അതിനെക്കുറിച്ച് ഏഴുവയസ്സുകാരനോട് രണ്ടാനച്ഛന് ചോദിച്ചു. വ്യക്തമായ ഉത്തരം കിട്ടാത്തതിനെ തുടര്ന്നാണ് രണ്ടാനച്ഛന് മൂത്ത കുഞ്ഞിനെ മര്ദ്ദിച്ചതെന്നാണ് വിവരം.
തടയാന് ശ്രമിച്ച അമ്മയുടെ മുഖത്ത് അടിക്കുകയും ചെയ്തു. ഇത് കണ്ട് പേടിച്ച് കരഞ്ഞ മൂത്തകുട്ടിയെ ഇയാള് നിലത്തിട്ട് പല തവണ തലയില് ചവിട്ടി. ഇളയ കുഞ്ഞിനും മര്ദ്ദനമേറ്റു. ഏഴുവയസ്സുകാരന്റെ തലയ്ക്ക് പിന്നില് ആഴത്തില് മുറിവുണ്ടായതായി കണ്ടെത്തിയിട്ടുണ്ട്. നേരത്തേയും ഇയാള് കുഞ്ഞുങ്ങളെ അടിച്ചിട്ടുണ്ടെന്നും പോലീസിന് വിവരം ലഭിച്ചു.
അതേസമയം, കുട്ടിയെ കോലഞ്ചേരി മെഡിക്കല് കോളേജില് അടിയന്തര ശസ്ത്രക്രിയയ്ക്ക് വിധേയനാക്കി. ആന്തരിക രക്തസ്രാവമുള്ളതിനാല് കുട്ടിയുടെ അവസ്ഥ മോശമായി തന്നെ തുടരുകയാണ്. കുട്ടി വെന്റിലേറ്ററില് 48 മണിക്കൂര് നിരീക്ഷണത്തിലാണെന്ന് ഡോക്ടര്മാര് അറിയിച്ചു. അമ്മയുടേയും ഇളയ കുട്ടിയുടെയും മൊഴി ചൈല്ഡ് വെല്ഫെയര് കമ്മിറ്റി രേഖപ്പെടുത്തിയിട്ടുണ്ട്.
പത്ത് മാസം മുമ്പാണ് കുട്ടികളുടെ പിതാവ് മരിച്ചത്. തുടര്ന്ന് തിരുവനന്തപുരം സ്വദേശിയായ മുപ്പത്തഞ്ചുകാരനെ കുട്ടികളുടെ അമ്മ വിവാഹം കഴിക്കുകയായിരുന്നു.